Тений Звенигово олаште эртаралтше Марий самырык тукым слёт ятыр чолга, ончыко вӱден моштышо ӱдыр-рвезе-влакым поген. Нунын кокла гыч иктыже – Ижевскыште илыше Камила Култашева.
Ӱдыр тений 11-ше классым тунем пытарен. Тунемаш пураш тӱрлӧ вере (рекламе да общественность дене кыл, медиакоммуникаций, савыктыме паша) документым пуэн. Кызыт шонымо специальностьшо дене пурен кертше студент-влакын спискыштым вуча.
Мер пашам йӧрата
Камилан ача-аваже Татарстан Республикысе Агрыз район Кадрек села гыч улыт. Но ятыр ий Одо кундемын рӱдолаштыже илат. Камила Удмуртийыште шочын гынат, чонжылан Агрыз район лишылрак. Ӱдыр изинек марий тӱвырам ужын, марий йылмым колын кушкын, «Кандырам пунен» куштымашым йӧратен. Шочмо йылмыж дене ончыч шагалрак мутланен гын, кызыт утларак марла ойлаш тырша. Тудо каласкала:
– Тӱрлӧ мероприятийыште марий койышемым ончыкташ кумылан улам. Пел ий ончыч Ижевскысе Калык-влак келшымаш пӧртыштӧ «Удмуртия – наш общий дом» еш мероприятий эртен. Тушто татар, узбек, одо да руш еш-влак дене пырля мемнан марий ешнат мастарлыкшым ончыктен. Концерт деч посна мастер-класслаште лиме. Чыла тиде еш кӧргыштат вес национальностян еш-влак денат кылнам пеҥгыдемден.
Тылеч вара мыйым «Иж Мари» мер организацийын да Одо Марий Ушемын председательышт Елена Крупнева ден Николай Ямаков тӱрлӧ фестивальыш, конкурсыш ӱжаш тӱҥалыныт. Апрельыште Ижевскыште туныктымо интенсивыште участвоватленам. Тушто «Ӱжара» марий самырык тукым ушемын председательже Анна Лукина дене вашлийынам. Тиддеч вара «Ӱжаран» чолга еҥже лийынам. Такшым марий самырык тукым ушем нерген эше февральыштак пален налынам. Тунам мый «Марий мундыра» акцийыште участвоватленам, шочмо йылме дене почеламутым лудынам. Мо оҥайже, лудмо почеламутем «Ӱжаран» ик чолга еҥже возен.
Сарапулышто Талешке кечылан пӧлеклалтше марий тӱвыра тӱнямбал фестивальыште лийынам. Мемнан коллектвина «Кермыч коҥга» усталык номерым ончыктен.
Июньышто ушемна «Самырык кыл» молодежный форумым эртарен. Тушко 50 утла участник толын. Тӱрлӧ аланыште тыршыше палыме марий спикер-влак лийыныт. Мыйын пашам форумышто медиапродвижений дене кылдалтын. Видео-влакым монтироватленам, соцкыллаште пост-влакым возенам.
«Иж Мари» организацийын еҥ-влак дене пырля тений Марий Сарамак ялыште эртаралтше Семыкыште усталык номерым ончыктенна.
Слёт нерген шарнымаш ӱмырешлан кодеш
Камила тений икымше гана Агрыз районысо делегаций дене пырля Марий Самырык тукым слётыш толын.
– Уло Россий гыч толшо ӱдыр-рвезе-влак вич кечыште марий культур дене утларак палыме лийынна. Тиде жапым ӱмырешлан чоныштем аралаш тӱҥалам. Эн ончыч толаш але уке, ятыр жап шоненам. Содыки марла удан мутланем, трук мыйым слётыш огыт нал шонымаш лийын. Палымем Александра Исаева «Айда слётыш каена» возен. Лишыл еҥ дене тора марий мландыш каяш лӱдыкшӧ огылыс. Кадрек тӱвыра рӱдерын чолга самырык еҥже-влак дене пырля мыят слётыш миен толаш кумылаҥынам. Ик кечылан вараш толмо гынат, мемнам куанен вашлийыныт. Кажне кечын «изи тул» лийын. Участник-влак, погынен, кече эртыме, мо дене тудо шарнымашеш кодмо нерген мутланенна.
Мый кокымшо лужаш логалынам. Мемнан командына тӱрлӧ мероприятийыште эре ончылно лийын. Тидыже икоян улмынам ончыктен. Ӱшанем, вес ийынат слётыш толын кертам. Организатор-влаклан кугу тау! – ойла Камила.
К.Култашева марий улмыж дене кугешна. Марий калыкын поян тӱвыраже, шкешотан йӱлаже, мотор йылмыже дене вес национальностян еҥ-влакымат палдараш тырша. Теве шукерте огыл, 27 июльышто, «Иж Мари» мер организаций дене пырля Вардавар армян пайремыште участвоватлен. Тушто нуно, сылне марий вургемым чиен, «Йӱржӧ йӱреш» мурым йоҥгалтареныт.
Еш альбом гыч налме фото.