Тушто Марий Элын чапшым Наталья Ошаева ден Марина Беляева араленыт. Коктынат марий вургем дене лектыныт. Творческий конкурсышто Наталья «Звенящие браслеты» куштымашым ончыктен. Тыгодым экраныште марий пӱртӱсын моторлыкшо ончыкталтын, ныжылге марий муро йоҥген. А Марина, Йошкар-Ола-Медведево вел марий тувырым чиен, рӱдолан гимнжым мурен.
Тиде мероприятийым «На коляске без барьеров» мер организаций эртара. Вуйлатышыже – Юлия Яганова.
– Ты юбилейный ийыште финалыш ондакысе конкурсантке-влакым ӱжыныт. Мый 2018 ийыште тушко ушненам ыле, сандене вигак анкетым колтышым. Тушто элнан тӱрлӧ верже – Марий Эл, Тыва, Крым республикла, Моско, Киров область, Рязань, Санкт-Петербург да Краснодар –гыч 13 ӱдыр ыле.
Конкурсышто видеовизиткым ямдылыман да 2018 ийыште участвоватлыме деч вара мо вашталтме нерген каласкалыман, усталык номерым да финаллан кас тувырым ямдылыман ыле.
Финал деч ончыч конкурс-влак эртеныт. Тушто оҥай вашлиймаш ден мероприятий-шамыч лийыныт. Мутлан, дизайнер А.Михайлован упшыж дене фотосессий путырак келшен. А вара Кронштадт олаш экскурсий дене коштыктеныт. Ме чыланат моторлыкым гына огыл ончыктенна, тыгак усталык йӧн кумда манмым пеҥгыдемденна, – каласкалыш Н.Ошаева.
А М.Беляева шкенжым «Царица алых роз» ден «Незнакомка» образлаште ончыктен. Тудлан Кронштадт олаш специально адаптироватлыме такси дене коштыктымо келшен. Тыгак ятыр еҥ дене палыме лийын. Этнофестивальыште ӱдыр-влакын вургемыштым куанен ончен, а творческий номерышт чонжым сымыстареныт.
Фото-влакым Н.Ошаеван да М.Беляеван альбомышт гыч налме.