Марий туныктышо Москошто сеҥен

12-15 ноябрьыште Москваште шочмо йылмым туныктышо-влаклан Россий кӱкшытан мастер-класс эртаралтын.

Тыште Марий Эл Республикын чапшым Волжский район Карай школышто марий йылмым да литературым туныктышо В.Емельянова арален да «Учитель-новатор» номинацийыште сеҥышыш лектын.

Тудо видеоуроклан методический комментарийым пуымо шотышто мастер-классым ончыктен, Волжский районысо марий сӱан вургем нерген презентацийым ыштен. Тыгак шке авторский программыже, статьяже, савыкталтше материалже-влак дене палдарен.

Валентина Валериановнам ты сеҥымаш дене уло кумылын саламлена да тӱвыргӧ паша лектышым тыланена.