МАРИЙ ТАНКИСТ ВИЯН!

 

 

3-17 августышто Моско областьысе «Алабино» полигонышто «Танковый биатлон» тӱнямбал чемпионат эртаралтын. Тыште 25 эл гыч тале танкист-влак ӱчашеныт. Тений тудо шымше гана эртаралтын.

Чемпионатыште элнан чапшым аралыше-влак радамыште Морко район Купсола ялыште шочшо 23 ияш рвезе Дмитрий Ивановат лийын. Ме тудын участвоватлымыжлан моткоч куаненна. Вет Российын экипажше сеҥышыш лектын. Ме палена: марий рвезе виян!

Спорт дене таҥлалт кушмыж нерген Диман тунемме верыштыже (а тудо 5-11-ше класслаште Морко район Кокласола лицейыште тунемын) физмат классым вуйлатыше В.Н.Васильев пеҥгыдемден каласыш:

Дима Кокласола лицейым 2013 ийыште сайын тунем пытарыш. Изиж годсек спорт дене кылым кучен. Лицейыште «Патриот» оборонно-спортивный районный лагерь пашам ыштыш. Тушто Дима мастарлыкшым, военный шинчымашым ончыктен. Кеч-могай пашам кӱлын ыштен, мучаш марте шуктен. Тунемаш каяш кӱлынак ямдылалтеш ыле. Казаньыште тунеммыж годым ече дене ӱчашаш коштын. Мут колыштшо рвезе. Сай йолташ.

Морко район Купсолаште Ивановмыт ешыште кок эрге кушкын. Кугуракше, Алексей, Озаҥ – Адлер поезд маршрут дене проводниклан пашам ышта. А Дмитрий военный корным ойырен налын.

Ачашт, Геннадий Петрович, «Звениговский» шыл комбинатыште исполнительный директорын алмаштышыжлан пашам ышта. Аваже, Надежда Изосимовна, ончыч ургызылан пашам ыштен, кызыт ялыштак сурт-пече кокласе сомылым шукта.

Д.Иванов 5-ше классыш биохим классышке шке кумылын тунемаш толын да 10-шо класс марте тунемеш. 11-ше классыште физико-математический шинчымашым пуымо классыште шинчымашым пога да варажым Озаҥысе высший военный училищыш тунемаш пура. Тудым йошкар диплом (!) дене пытара да «Командир танковых подразделений» специальностьым налеш. Тунем лекме деч вара распределений почеш Абхазийыште служитлаш тӱҥалеш.

Лицейыште тунеммыж годым Дима Иванов ден Волжский район Ӱлыл Азъял гыч Павел Антонов дене кугу йолташ лийыныт. Варажым Павел дене пырля Озаҥыште тунемын. Кызыт йолташыже Чечняште служитла, взводын командирже.

Дмитрий Озаҥыште тунеммыж годымат Всеармейский модмашлаште «Танковый биатлонышто» участвоватлен. Тунам тудо операторын наводчикше рольым шуктен. А кызыт ты марий рвезе 1-ше танковый ротын 1-ше взводшын командирже!

Снимкыште Дмитрий шола гыч икымше  шке экипажше дене пырля шога.

«Российын сборныйышкыжо тений майыште «Арми-2019» модмаш деч вара логалынам. Тунам мыйын вуйлатыме экипаж сеҥен ыле, – ойла Д.Иванов. – Вара тӱҥ составыш еҥ-влакым ойырен налаш манын, «Алабино» полигоныш 9 экипажым колтышт. Ме тушто кок тылзат пеле танковый биатлон дене тӱнямбал чемпионатлан ямдылалтынна. Ты жапыште экипаж-влакын рейтингыштым моткоч пӱсын эскереныт. Август тӱҥалтышлан ныл эн сай экипажым ойырышт. Тушко мемнан экипажат логале. Сеҥышыш лекташ профессионал-влакын тыршымашышт полшен».

Д.Иванов военный службо деч посна еш илыш нергенат шонкала. Келшыме ӱдыржӧ уло. Настя кок ийлан изирак, Кокласола лицейыштак биохим классыште тунемын. А кызытеш службо, службо…

 

Эльвира Терентьева.