Марий тӱвыра кече

27 ноябрьыште Киров областьысе Вятские Поляны олаште Марий тӱвыра кечылан пӧлеклалтше пайрем эртаралтын. Тышке Киров кундемысе, Марий Элысе, Татарстанысе да Свердловск областьысе марий-влакын чолга еҥышт погыненыт.

Ты кечын  калык кидпаша, тӱрлӧ книга-влак дене палдарыше ончер, йыргешке ӱстел сынан вашлиймаш эртаралтыныт, тыгак мурышо да куштышо коллектив-влак шке мастарлыкыштым ончыктеныт. Пайремыш Марий Эл Республикысе тӱвыра рӱдер пеленысе  «Сото вий», «Чон оҥгыр», «Падыраш», тыгак Шернур кундем гыч «Пӧлек» ансамбль-влак миеныт.

Погынышо-влакым Киров областьысе элгӧргӧ политке шотышто министрын алмаштышыже И.Никитина, «Российысе марий-влакын федерал калыкле-тӱвыра автономийышт» мер ушемым вуйлатыше Л.Яковлева саламленыт.