У награде
Марий Элым Вуйлатыше Ю.Зайцев «За достойное воспитание» почётан у знакым пеҥгыдемден.
Тудым Марий Элыште вич ий деч шагал огыл илыше, кок да утларак йочам воспитатлыше ешлан пуат; тыгодым икшывышт тунеммаште, пашаште, спортышто, творчествыште, наукышто але сымыктышыште сеҥымашыш шушаш. Почётан знак дене пырля оксам пуат. Шӱдырла койшо ты знакым ший тӱсан латунь гыч ыштыме, тӱрыштыжӧ – кечыйол, а покшелне – еш пыжашым пеҥгыдемдыше марий тӱран символ. Наградым Аван кечыж вашеш кучыктат.