– манеш кидмастар Марина Ахмадуллова.
Набережный Челна олаште илыше ты кидмастар дене кодшо кечылаште палыме лийым. Фотосӱретыште шуктымо пашажлан куаненак колтышым. Марий тӱран чатка, сӧрал паша эре шӱм-чоннам куандара. Тушто кумыл дене ыштымым да мастарлыкым шижат.
– Ачам ден авам Актаныш район Марий Суксо ял гыч улыт. Мыйынат йоча жапем лач тушто коча-ковам-влак дене эртен. Нуно марла кутыреныт, ковамже эше сылнын муралта ыле. Шкеже марла мутланен ом мошто гынат, умылем. Такшым авам Нина Ринатовна ден ачам Рамзиль Шаехович Исанов марла, татарла да рушла кутырат. Ачамже – 6-шо разрядан токарь, авам – ОТК контролёр. А мый ургызо улам, заказ почеш ургем, – ойла Марина.
Тудо Набережный Челнаште 48-ше номеран школ деч вара 114-ше училищыште портнойлан тунем лектын да икмыняр ий ательеште пашам ыштен. Тушто пограничник ден полицейский-влаклан фуражкым урген. А варажым Российыште чапланыше «Подиум» проектын участницыже Ольга Куарцеван академийыштыже онлайн тунем лектын. Тушто мотор тувырым, корсетым да йымал вургемым ургымо шотышто шинчымашым налын.
– Ӱдырамаш-шамычлан мотор тувырым ургымеке, чонлан ала-мо ок ситыла чучын. Тунам Йошкар-Олаште илыше Надежда Акиеван курсшым налынам. Марий орнамент-влак эреак лишыл лийыныт. Кызыт нуным пашаштем кучылт моштымемлан куанем, – манеш кидмастар.
М.Ахмадуллова Набережный Челна оласе «Эрвий» йоча кас школыш коштшо марий ансамбльлан вургемым ямдылен. Тидланже ательеште машинный тӱрым заказатлен, а узоржым шке сӱретлен пуэн. А вуйчиемым да ӱштым шер да пайетке дене сӧрастарен. У ий вашеш кидмастар Йӱштӧ Кугыза курчаклан вургемым марий тӱр дене келыштарен. Тылеч ончыч ик марий мужырын сӱанжылан ӱдырамаш ден пӧръеҥ вургемым ыштен. А кызыт Марина марий сынан одеялым ыштен шуктен.
Кидмастар шке сомылжым тыршенак шукта, сандене ятыр сӧрал арвержым эше шуко вере ужына, шонем.
Эльвира Терентьева.
Фото-влакым кидмастарын альбомжо гыч налме.