Кызыт кугу сӱан, чапле машина, поян ӱстел сий дене унавлакым от ӧрыктаре. Ӱдырым имне тарантас дене налаш миет гын, калыклан вучыдымо лиеш дыр. А теве Марий Турек районысо Арбор кундем Памашъял гыч Надежда ден Олег Ивановмытын сӱаныштышт мурен-куштышо сӱанвате гына огыл, уло ешышт дене марий вургемым чиеныт.
Ӱдыр-каче поснак сылне тувырышт дене мотор мужыр йӱксыла волгалтыныт. «Марлан кайыме годым кеч кыдалым марий тӱран ӱштӧ дене сӧрастарышаш ыле шоненам», – ойла Надя. Ты шонымашыже шукталтын. Качымарийын акаже Надежда Михайлова – пеш уста ургызо, тӱрлызӧ, парикмахер. Тудо уло ешыжлан марий вургемым ыштен пуэн.
Надя Бусыгина Параньга район Ермучаш ялеш шочын-кушкын. Матародо школ деч вара МарГУ-н историй да филологий факультетыштыже историклан тунемын. Озаҥ оласе коррекционный школинтернатыште ик ий пашам ыштымек, ачаж дене пырля Москош каен. Туштак Олег дене палыме лийын. Качымарий Надям Интернетыштак ужын улмаш, ӱдыр тудлан вигак келшен. Олег Надян шочмо ялысе рвезевлак дене пырля пашам ыштен. Поро кумылан сылне ӱдыр ден Арбор каче коклаште йӧратымаш тул ылыжын. Ик ий келшымеке, кугу сӱаным тарватеныт.
Олег кызытат Москош вахте йӧн дене пашам ышташ кудалыштеш. А Надежда, марлан лекмеке, Интернет полшымо дене воспитательлан курсым тунем лектын, Арбор йочасадыште тыршен. Кызыт изи эргыж дене мӧҥгыштӧ шинча. Кидпашалан пеш мастар: тӱрла, пидеш, урга. Самырык еш вольыкым ашна, кок ушкалышт уло.
Анна АЛЫКЕЧЕВА.
Марий Турек район.