Тыге ойла шкеж нерген Йошкар-Оласе 3-шо №-ан школышто 8-ше классыште тунемше Равиль Игнатьев. Кундемыштына шке таҥашыже-влак коклаште тудо RAVILKA псевдоним дене палыме. Рвезе мурым воза да рушла, марла, татарла мура, тылеч посна блогер семын шкенжым шуара.
КОК КАЛЫКЫН ЙӰЛАЖЫМ ПАЛА
Равильын ачаже – марий, аваже – марий-татар ӱдырамаш. Рвезе марлат, татарлат мутланен мошта.
– Каникул жапым шукыж годым Морко районышто авамын шочмо Шеҥше селаште коча-ковам дене эртаренам. Марла мутланаш Владимир кочам туныктен. Тудо рушла ом мошто манеш ыле. Чаманен каласыман, ӱмаште кочам илыш дене чеверласен. Рамзия ковам татарла туныктен. Ешыште коча ден ковам утларакшым марла мутланат ыле, лач южгунам – татарла, – манеш Равиль.
ХИП-ХОП ДА ПОП
Р.Игнатьев хип-хоп да поп жанрла дене мурым мура.
– Кызытсе самырык тукым коклаште хип-хоп музык кумдан шарлен. Тудо ритм дене ойыртемалтеш. Тыгай музык шуко еҥын кумылжым савыра.
Икымше гана кугу сценыш шке возымо «Моя малая», «Снежинка» мурыла дене 2023 ий январьыште Морко посёлкысо тӱвыра пӧртыштӧ лектынам. Тунам тушто районысо «Калейдоскоп» йоча эстраде усталык фестиваль эртаралтын. Сценыш лекме деч ончыч чот тургыжланенам. Но вара калык ончыко шогалмеке, чонемым куан тул ылыжтен, мылам моткоч келшен. Тунам умыленам: музык – мыйын ончыкылыкем, – каласкала самырык музыкант.
Равиль Игнатьевын мурыжо-влакым 50 тӱжем наре гана колыштыныт.
МАРЛАТ МУРА
Але шукылан тунемман, манеш рвезе. Тудо кугу таум марий мурызо Светлана Яндуковалан ойла. Равиль икана М.Шкетан лӱмеш Марий драмтеатрыште тудын концертше нерген афишым ужын. «ВКонтакте» соцкылыште Светлана Яндуковалан музыкым йӧратымыж нерген возен колтен.
Тыге мурызо дене палыме лийын. Тудо Р.Игнатьевлан «Моторем» мурым возаш полшен. А ик концертыште дуэт дене Равильын «Асыл кош» мурыжым муреныт.
– Моло артистым палемдаш гын, Элвин Грей башкир мурызын творчествыже чонемлан лишыл. Ончыкшым эл мучко кугу турыш лекнем. Ача-авам мылам тӱҥалме пашаштем полшен шогат, – каласкала музыкант.
Равиль Колумб лудмаште ныл гана мастарлыкшым ончыктен. Йошкар-Ола кӱкшытыштӧ кок гана лийын да икымше верым сеҥен налын. Кок гана республиканский лудмашке ушнен да туштат ончылно лийын. Теният Колумб лудмашке мияш шона.
ЭШЕ БЛОГЕ
Равильын кызытеш «Моя малая», «Снежинка», «Девочка-Онлайн», «Асыл Кош», «Моторем» да шукерте огыл ош тӱням ужшо «Искринка» мурыжо-влакым тӱрлӧ музык площадкыште, тыгак ВК музык сервисыште, соцкыллаште колышташ лиеш.
Равиль блогер семынат вияҥеш. Тӱрлӧ темылан видеом сниматла, палыме кевыт-влаклан рекламым ышта.
– Музык ден блогер пашам мылам кызытеш изи гынат, но оксам конда, – манеш Р.Игнатьев.
Равиль яра жапшым айда-лийже ок эртаре. Тунемеш, мурым воза, футболла да волейболла модеш. Илыш нерген шонкалаш йӧрата. Ончыкшым палыме музыкант лийнеже. Тений кеҥежлан марий да татар муро-влакым калык ончыко лукташ ямдылалтеш.
Равильын альбомжо гыч налме фото-влак.