Морко посёлкышто марий сотемдарче, миссионер, туныктышо, ӱмыржӧ мучко черке пашаште тыршыше, шочмо калыкнан шинчымашыжым нӧлтымаште кугу надырым ыштыше Гавриил Яковлевын шочмыжлан 180 ий темме лӱмеш конференций эртен. (видео уло)
Конференцийын пленар погынымашыжым Йошкар-Олан да Марий митрополий вуйлатыше Иоанн почын: «Гавриил Яковлевын лектышан пашаже апостол семын тыршымылан шотлалтшаш, очыни. Шкенжын отчетшо гыч палена: тудын марла эртарыме службо годым калык шинчавӱд дене юмылтен. Юмылан шочмо йылме дене пелештыме мут, шӱм шижмаш гыч лектеш. А шӱм эреак тудым шочыктышо деке шупшеш».
Черке паша деч посна Гавриил Яковлев шуко кусарен, туныктен. Тудын илышыж нерген Марий митрополийын кусарыше комиссийжым вуйлатыше, «Шӱм-чон изолык» журналын тӱҥ редакторжо, Морко районысо Арын черке вуйлатыше протоиерей Николай ача, филологий шанче кандидат Надежда Федосеева каласкаленыт.
Йошкар-Оласе Сергий Радонежский лӱмеш гимназийын директоржо, протоиерей Евгений ача тачысе илышыште туныктышо-наставникын верже, тудын кӱлешлыкше шотышто ойлен. Йошкар-Ола ракетный дивизий командирын полышкалышыже, архангел Михаил лӱмеш воинский черкын вуйлатышыже Георгий ача шке докладыштыже самырык-влакым патриотизм шӱлышеш кушташ кӱлмым тачысе саман пеҥгыдемда манын ушештарен.
Погынымаш жапыштак Морко черкын Рушарня школжын, искусство школын тунемшыже-влак, Арын черкын хоржо, Йошкар-Ола гыч Марий Элын сулло артисткыже М.Почтенева муро, “Марий мурсем” студент ансамбль, куштымашыж дене, баян дене Озаҥ оласе консерваторийын студентше И.Алексеев куандареныт.
Морко Тӱвыра пӧрт фойеште марлашке кусарыме Юмын книга выставке лийын. Калыкым тыгак Гавриил Яковлевын пашам ыштыме арверже дене палдареныт, Морко, Арын черкын илышыже фотоончер гоч ончыкталтын.
Пленар заседаний деч вара кок секцийыште паша шуйнен, иктыштыже “Марий Эл” савыктыш пӧрт” кугыжаныш автоном учрежденийын вуйлатышыже Э.Иманаев тачысе илышыште СМИ але соцкыл гоч шояк уверым шаркалыме, кузе тиддеч шекланыме шотышто ойлен.
Конференций кышкарыштак Морко поселкысо 6-шо да Кокласола школышто вашлиймаш лийын, черке пашаеҥ-влак тунемше-шамычлан осал деч порым, шоя деч чыным ойырен мошташ кӱлмым, илышыште кузе чын корно дене каяш лиймым умылтареныт.
Морко район администрацийын актовый залыштыже верысе кучем, ял администраций вуйлатыше-влак дене митрополит Иоанн вашлийын мутланен.
