Шукерте огыл Морко кундемысе марий йылмым туныктышо-влак дене Кужэҥер велке миен савырнышна. Туштак эртыше тунемме идалыкысе пытартыш методушем погынна эртаралте. Семинарнан темыжат «Марий йылме да литератур, ИКН уроклаште этнокультур материалым кучылтмаш» маналтын. А этнокультур материаллан «Марий Швейцарийым» ойырышна.
Ты вершӧрыш миен шуатат, пуйто юзо тӱняш логалат. Йырымваш ужар чодыра гӱжлен шога, кажне пушеҥгыже поро уна-влакым шке лышташлажым рӱзалтен шокшын вашлиеш. Чодыра коклаште «Марий Швейцарий» шке вержым айла. Покшечынже яндар памаш йоген эрта. Тышке кажне еҥ канаш миен кертеш. Кужу корно гыч мийыше уна-влакым Зина акай тамле кочкыш дене сийла, шудо чайым йӱкта. Тудак шокшо мончам олтен ямдыла, у выньык пуш чыланыштлан вий-куатым ешара. Туштак кугу бассейн, шашлыкым ышташ чыла арвер, чапле деч чапле беседке улыт – чылажым ойленат от пытаре…
Тыге Морко кундемысе этнокультур предметлам туныктышо-влак чон канен жапым эртареныт, Кӱ курык мучко экскурсий дене коштыныт, у тунемме идалыклан шке уроклаштышт кучылташ поян материалым погеныт.
«Марий Швейцарийын» чылажге 9 каныме верже уло. Мыланна пиал шыргыжале вич верышкыже логалаш, нуным эн сӧраллан шотлат.
Тек ончыкшымат «Марий Швейцарий» пеледеш да тӱзлана, шке шулдыржо йымаке шуко-шуко унам вӱдылеш, нунылан чон куатым пӧлекла.
Елена Григорьева, Морко районышто этнокультур предметлам туныктышо-влакын методушем вуйлатышышт.
