Морко район Зеленогорский школышто кызыт 97 йоча шинчымашым налеш, 15 туныктышо тырша. Наталия Геннадьевна Малинина 2017 ий годсек тыште марий кугыжаныш йылмым туныкта, йочасадыште ятыр жап ыштен. Шке пашам йӧратыше, мастарлыкым нӧлтен толшо туныктышо тений «Марий йылмым эн сай туныктышо» республикысе конкурсышко ушнен.
Тыгай шотан конкурс тудлан палыдыме огыл. Эше самырыкше годымак «Идалыкысе эн сай воспитатель» конкурсышко ушнен да посна номинацийыште палемдалтын.
Зеленогорский школышто марий, руш, татар, лезгин йоча-шамыч шинчымашым налыт. Куандара: марий йылмым тунемаш иктат тореш огыл. Мутат уке, тыште Наталия Геннадьевнан тыршымыже моткоч кугу. Тудо кажныжым йылмылан шӱмаҥден мошта. Тыгодым лектышат уло: йоча-шамыч марий мутым кумылын тунемыт, йылмым умылаш тӧчат да тыгак марла муралтенат колтат. Тидым ӧрдыж гыч эскерен, пашам ышташ кумылет утыр лектеш.
– Шочмо йылмым вияҥден толман. Ме, кугурак ийготан туныктышо-шамыч, марий йылмым мондена, тудым тӱзаташ огына тӱҥал гын, йылмына йомын кертеш. Йоча-влаклан примерым ончыктыман. Тыгай шонымаш дене конкурсыш ушнышым. Урокем марий пайрем, кочкыш теме дене кылдалтын ыле. Шочмо йылмым туныктымаште кроссворд йӧным кучылтам. Тидыже йоча-шамычлан марий шомак-влакым сайынрак шарнен кодаш полша. Кузе тиде ышталтеш, тыште мастер-классым ончыктышым.
Тунемше-влаклан марий йӱла, калыкнан кочкышыжо, тӱрлӧ пайрем нерген каласкаленак шогем. Ме марла мурена, куштена, тыгак марий модыш дене модына, почеламутым тунемына.
Шинчымашем эре нӧлташ тыршем. Тыге марий йылмын методикыжым кучылташ тунемам. Йоча-влакат пеш тыршат. Икана руш йоча тынар кумылаҥын, эсогыл мӧҥгыштыжӧ марий мурымат тунем толын ыле. А мо нерген ойлалтеш – шкежат, ача-аважат пален огытыл. Сандене мый декем толын да кусараш йодын. Пеш куандара. Тидын шотышто шуко примерым конден кертам. Мутлан, 9-ше классыште ава дене кылдалтше урокым эртаренам. Классыште – 19 йоча, чыланат тӱрлӧ калыкын шочшыжо улыт. Кажныже ава нерген ойыртемалтше пале мутым кычалын муын кертын. Тугеже пашам арам огыл. Ончыкылан тыршаш да йоча-шамычым марий йылмылан эше утыр кумылаҥдаш шонем, – мане Н.Малинина.
Йоча-шамычын сайын тунеммышт – туныктышын паша лектышыже. Наталия Малинина тидын шотышто уста еҥ, кажне икшыве дене кутырен мошта, марий йылмын сӧраллыкшым, ямжым чоныш шыҥдара. Шочмо йылмым кеч-кунамат йӧратен тунемман, аклен илыман.