Параньга район Олор ялеш шочын-кушшо, Йошкар-Оласе технологический колледжыште 2-шо курсышто тунемше Александр Леонтьев – чолга, талантан рвезе. Гитар дене сайын шокта, лыжган мура, лывыргын кушта. «Марий мурсем» ансамбльышке кокымшо ий коштеш, тӱрлӧ мероприятийышке ушна. Июнь тӱҥалтыште Саша Челябинск олаште XXX «Российысе студент шошо» фестивальыште лийын.
– Тыгай фестиваль икымше гана эртаралтын, Российын тӱрлӧ регионжо гыч 2000 утла студент погынен. Ме Марий Эл гыч ныл рвезе да кок ӱдыр лийынна. Марий такмакым муренна да тудын почеш куштенна. Тоштерыш миенна, Российысе кугу артист-влакым ужынна, мастер-классышке ушненна. Мыланем фестиваль келшен. Тушко уэш кайыме шуэш, – каласыш Саша.
Ешге мурат, куштат
Рвезе изиж годсек моло деч ойыртемалтын. Тунеммаште чолга, мураш-кушташ эре мастар лийын, тыгак спорт дене кылым кучен. Ялысе, школысо тӱрлӧ мероприятийышке кумылын ушнен. Такшым Леонтьевмыт ешге мураш-кушташ кертыт. Тидын шотышто Сашалан ача-ава, коча-кова кугу пример улыт.
– Кочам сайын кушта, ковам мура да кушта, тудо Олор ялысе «Кас ӱжара» ансамбльышке коштеш. Ачам гитар дене сылнын шокта да мура, шольым ден шӱжарем лывыргын куштат. Мыят изинек мураш-кушташ йӧратем. Тӱҥалтыш класслаште Параньга посёлкысо музыкальный школышко коштынам. Школысо тӱрлӧ мероприятийышке, концертышке, тыгак шкенан Олор ялысе поэт Е.Герасимов лӱмеш сылнымут лудмашке чӱчкыдын ушненам. Мыскарам ышташ кумылан улам. Сандене школ команде дене районысо КВН модмашке коштынам.
Школышто тунемме годым «Еш архив» республикысе конкурсышто ешем, тукымем нерген палдаренам. Тунам районышто ме икымше вер дене палемдалтынна. Спортымат йӧратем, поснак футбол келша, – мане А.Леонтьев.
Умбакыже 24 июньышто лекше у номерыште лудса.