Марий семым колыштын кушкын

Каменщиков

Иван Каменщиков Кужэҥер район Йывансола ялыште шочын-кушкын. Йоча пагыт гычак тошто арвер але ӱзгар-влакым шымлаш йӧратен.

Иктаж ныл ияш лиймем годым пӧртлан негызым кӱнченыт. Мланде гыч тӱрлыжат лектеден: кленча, шинчыр, тошто окса. Изам чыла тидым ӧрдыжыш поген оптен, а мылам оҥайын чучын. Жап эртымеке, леваш йымалне изирак тоштерым ыштенам. Тушто экспонат-влак эркын шукемыныт. У пӧртыш илаш куснымеке, тошто пӧртыштӧ тоштерым ыштышым. Олаште тунеммем годым икмыняр ӱзгарым Кужэҥер посёлкысо тоштерыш колтенам. Молышт мӧҥгыштак аралалтыт, – шарналтыш Иван.

Нылымше класс гыч школ пеленысе духовой оркестрыш коштын, труба дене шоктен. Индешымше классым тунем пытарымеке, 2005 ийыште Йошкар-Олашке тунемаш каен. И.С.Ключников-Палантай лӱмеш тӱвыра да сымыктыш колледжыште «Калык семӱзгар» отделенийыште шинчымашым поген. Индешымше класс деч вара олаш каяш шонен огыл, но ачаже (Евгений Каменщиков) темлен. Тудо жаплан Иван гармонь дене шоктен моштен.

14 ияш годсек «Мурсескем» ансамбльыш коштеш. Ансамбльлан 25 ий теме лӱмеш (2004 ийыште) кугу концертым ямдыленыт. Тунам Иванымат ӱжыныт. Тудо жап годсек рвезе ансамбльыш ушнен. Кызытат кертмыж семын полшен шога, тӱрлӧ фестивальлаш пырля коштеш.

Икымше гана тора кундемыш гастроль дене мийымым шарнет? Кушко миенда?

Икымше гана Хант-Манси автономный округысо, Белоярск олаш миенна ыле. Корно чот кужу. Кок кече поезд дене, а вара куд шагат автобус дене кудалынна. Автобусшат манаш огеш лий, очыни. «Урал» машинан тележкыж олмеш будко лийын. 2009 ийыште Татарстан Республикыште «Крутушка» этнофестиваль эртаралтын. Тиде мероприятий сай шарнымашым коден. Тушто мый музык нерген шукырак пален налынам. Фестивальыште тӱрлӧ сынан мурым колаш логалын, мутлан, калык мурым рок музык почеш муреныт. Тидыже мыйым чот ӧрыктарен. Ача-авам тӱвыра аланыште пашам ыштат, сандене марий калык мурым колыштын кушкынам. Изамат ола гыч тӱрлӧ кассетым, ача-авам ансамбль дене вес элла гычат ятыр кассетым конденыт. Но ты фестивальыште йоҥгалтше сем чот ойыртемалтын, – каласкалыш Иван.

Колледжым тунем пытарымеке, МарГУ-ш филологий факультетыш тунемаш пурен, но идалык гыч тӱвыра да сымыктыш факультетыш вончен. Тушто Степан Сверчков дене палыме лийын. Кок рвезын музык нерген умылымашышт икгайрак лийын, сандене пырля шокташ тӱҥалыныт. Икымше гана Музык кечылан кафедрыште изирак концертым ончыктеныт. Вара «Студвесна» фестиваль годым выступатленыт. Тыге эркын-эркын опытым погеныт.

Университетыште пытартыш курсышто улмем годым «Святые моторы» командым погенна ыле. Тушко оркестрыш пырля коштшо да вес йолташ-влакат ушненыт. Иктаж лу еҥ лийынна, а ик гана сценыш латвизытын лектынна. Тыгак «Аперетив» группынат лийын. Тудым Яныш Созонов чумырен ыле. Мый тушто труба дене шоктенам. Кызыт «У еҥ» ансамбльыште да «Куат» группышто гына Степан дене пырля улына. Тыгак «Харбанг» группына лийын. Тиде группо дене ме Марий Элыште фолк-металлым эн ончыч шокташ тӱҥалынна.

Кызыт кушто пашам ыштет?

«Марий Эл» ансамбльын оркестрыштыже ударный инструмент дене перкалем. Тыгак И.С.Ключников-Палантай лӱмеш тӱвыра да сымыктыш колледжыште флейте да шӱвыр дене шокташ туныктем.

Йоча годсек марий семым колыштын да марий куштымашым ужын кушшо еҥ шочмо калыкшым пагалаш, аклаш тӱҥалеш. А кунам тудо тиде паша дене илышыжым кылда – эшеат кугу пиал. Россий Федераций тӱвыран сулло пашаеҥже Евгений Каменщиков ден Вера пелашыже тыгай эрге дене кугешнен кертыт.