Йошкар-Олан кечыж вашеш пу гыч пӱчкедыше мастар-влак коклаште «Марий калыкын легендыже-влак» фестиваль-конкурс кокымшо ий почела эртаралтын.
Патыр-влак да молат
Тений фестивальын темыже – марий талешке-влак. Марий Эл, Удмуртий да Моско область гыч 9 участник толын. Лу кече жапыште (30 июль гыч 8 август марте) нуно Йошкар-Оласе Марий парк воктенысе Цирк площадьыште Чумбылатын, Акпатырын, Чоткар, Кокша, Пашкан, Нӧнчык патыр-влакын, Пампалчын да Овдан образыштым шочыктеныт. Ны шокшо игече, ны кӱдырчан йӱр мастар-влаклан шке пашаштым шукташ чаракым ыштен кертын огытыл.
Ӱмаште пу гыч пӱчкедыше-влак марий калыкын мифологийже дене кылдалтше скульптур-шамычым ончыктеныт. Кызыт нуно Марий паркым сылнештарат. Пытартыш кечын фестивальын участникше-влак «Писе пила» конкурсышто шке мастарлыкыштым ончыктеныт. Нунылан тӱрлӧ янлыкын фигуржым шагатат пеле жапыште пӱчкын лукташ кӱлын.
Марий паркын сценыж гыч участник-влакым саламлаш Марий Эл Республикысе Правительстве Председательын алмаштышыже – тӱвыра, печать да калык-влакын пашашт шотышто министр Константин Иванов, Кугыжаныш Погынын Председательже Михаил Васютин да Йошкар-Ола мэрын сомылжым жаплан шуктышо Антон Трудинов толыныт.
Марий реставратор
Советский район Люперсола ял гыч Михаил Баранов ты фестивальыш икымше гана ушнен, тудо Пампалчын да шогертенын фигурыштым ыштен. Пӧръеҥ изиж годсек пу дене пашам ышташ йӧрата. Технологий урокыштат программым эртен каен, 5-ше классыште тунемше Миша лумъеҥым шке гыч пӱчкын луктын.
Михаил Москошто Академик И.Э.Грабарь лӱмеш Всероссийский художественный научно-реставрационный рӱдерыште художник-реставраторлан пашам ышта. Тыгай сынан конкурслаште кум ий наре ончыч гына участвоватлаш тӱҥалын. Лишыл жапыште Томскышко кая.
– Шонымем почеш Пампалче скульптурем кугурак лекшаш ыле, но пырня изирак лийын. Пыл-шамыч ден Пампалче коклаште верым шукырак коден, фигурым ушымо механизмым кӱкшыракым ыштынем ыле, тыге лӱҥгалтыш мардежым сайынрак кучышаш. Ончыкшым тыгай технический момент-шамычым шотыш налаш тӱҥалам.
Шогертенем тӱс деч посна палаш огеш лий, сандене, пум когартен, шем тӱсым пуышым. Ночкылан верчын тидым ышташ йӧсырак ыле. Тыгак шогертен вет шолышташ йӧрата, тудын умшашкыже совлам але шинчырым ешарынем ыле, но жап ыш сите, – ойла пӧръеҥ.
«Марий калыкын легендыже-влак» конкурсышто сеҥеныт:
- Икымше вер дене Шернур район гыч Владимир Антропов Чумбылат скульптуржо дене палемдалтын. Тудо ӱмаштат ты конкурсышто Онар пашаж дене ончыко лектын. Тыгак Чоткар патыр скульптуржым Волжский район Корамасыште ужаш лиеш.
- Кокымшо верыш Удмуртий гыч Сергей Назаров Кокша патыр скульптуржо дене лектын.
- Кумшышто – Моско область гыч Александр Смоленцев Акпатыр пашаж дене.
«Эн писе пила» конкурсышто сеҥыше-влак:
- Икымше верыште – Оршанке район гыч Сергей Тихонов Тага фигуржо дене.
- Кокымшо верыште – Удмуртий гыч Виктор Яковлев Рывыж фигуржо дене.
- Кумшо верыште – Кужэҥер район гыч Дмитрий Смородинов Пире фигур дене.
Вашке Марий паркыште шогышо шым пу скульптур деке эше индеше ешаралтеш.
Авторын да И.Речкинын фотошт.