Йошкар-Олаште кажне ийын ятыр верым шотыш кондат. А могайжым тыште илыше-влак шке решатлат. Тений 2023 ийлан шотыш кондышаш кумдык-влакым ойырена.

Йӱклымаш 15 апрельыште тӱҥалеш да 30 май марте шуйна. Чылаже 24 объектым спискыш пуртымо. Ме марий калыкым Марий парк верч йӱклаш ӱжына. 

Шукын шарнат, ондак Йошкар-Ола покшелне верланыше Ленин садыш шошым кажне кастене самырык-влак погынат ыле. Тудым чылан Марий парк манынна. Тыште пырля мурен-куштеныт, веселитленыт, вашла палыме лийыныт. Но кызыт тушто Чарла кремль верланен.

Йошкар-Олан мэрийже марий-влаклан Марий паркым ышташышт вес кумдыкым пуаш кутырен келшен: тиде – Изи Какшан вес могырно, Сомбатхей кундемыште «Тазалык аллей» воктенысе пӱнчерыште вер. Корно деч тора огыл, Петров урем ваштареш. Тудым кугыжаныш окса кӱшеш шотыш кондаш манын, шуко йӱкым погыман. Тунам веле ола ты кумдыкым сӧрастараш пижеш. Садлан 14 ияш деч кугурак чыла еҥым йӱклымашке ушнаш ӱжына. Тидым ышташ телефон, планшет, компьютер гоч Госуслуги порталыш пурыман да авторизацийым эртыман. Але za.gorodsreda.ru онлайн-платформышто йӱклаш лиеш.

Валерий Мочаев, Мер Каҥаш  вуйлатышын икымше алмаштышыже:

– Марий парк тӱрлӧ кундемыште, тӱрлӧ районышто илыше марий-влакым ушышо вер лийшаш. Тыште, мутлан, Шернур велын шке теҥгылже шинчыже, Морко велын –адак шке верже. Кажне марий еҥ ты паркыште марий улмыжым шижшаш. Тыштак марий сем йоҥгышаш, марий кочкыш кафе лийшаш.

Тыгак Марий паркыште вес калык диаспор-влакат погынен кертыт. Марий парк Йошкар-Олаште лийшаш. Садлан чыладам Марий парк территорий верч йӱклаш йодам.

Тений 8 общественный верым шотыш кондат. Нунын верч ӱмаште калык йӱклен.

Ирина Степанова.