«Марий памаш» ансамбль мураш-кушташ йӧратыше шуко еҥым иктеш чумыра. Тушко Йошкар-Оласе школлаште тунемше ӱдыр-влакат мастарлыкыштым нӧлташ коштыт. Нунын кокла гыч Анастасия Иванова ден Эвелина Антроповам палемден кодыман.
Кызыт илышын вашталт толмыж дене яллаште йоча-шамыч марла шагал мутланат, мураш-кушташ южгунамже ӧрыт гын, нунылан оласе ӱдыр-влак деч примерым налман. Тиде радамыш Анастасия Иванова ден Эвелина Антроповам пурташ лиеш. Руш коклаште илат гынат, шочмо йылме дене лывыргын мутланат, марий муро-куштымашлан кумылан улыт. Марий шӱлышан улмыштлан, кушташ йӧратымыштлан кӧра икоян коллективыш ушненыт.
Хореограф лийнеже
Анастасия Иванова – марий ача-аван шочшыжо. Шочмо калыкнан тӱвыра поянлыкшым изинек аклен кушкын. Мураш-кушташ йӧратен. Ты мастарлыкшым шотыш налын, ача-аваже тудым И.С.Палантай лӱмеш тӱвыра да сымыктыш колледжын Калыкле сымыктыш гимназийышкыже (ондак Талантан йоча-влакын Президент школ маналтын) 1-ше классышке тунемаш колтеныт. Ӱдыр тыште шым ий шинчымашым поген, «Изи памаш» йоча образцовый фольклор ансамбльышке коштын. Тачат ӱдыр ты коллективыште мура да кушта. Кызыт А.Иванова Йошкар-Оласе 14-ше №-ан гимназийыште 9-ше классыште тунемеш.
– Ачам мыйым кушташ кумылаҥден. Шкеже тудо Морко посёлко гыч, кушташ пеш йӧрата. Авамат усталык шӱлышан. «Изи памаш» ансамбльышке коштын, марий куштымашлан эшеат чот шӱмаҥынам. Тыште тыгак шкетын мурем. Ме тӱрлӧ вере лийынна, эн тораште Москошко лийынам.
Ӱмаште «Марий памаш» ансамбльышке кошташ тӱҥалынам. Тушко коллективым вуйлатыше Мария Лазаревна Соловьева шкеак ӱжын. Тудын дене кылна пеҥгыде. Жапыштыже «Изи памаш» ансамбльыште хореографлан ныл ий ыштен.
«Марий памаш» ансамбльым эше изирак улмем годымак ончен куаненам. Таче кажне репетицийыш йывыртен коштам. Гимназийыште ик классыште пырля тунемше ик ӱдырым тушко ушнаш кумылаҥденам.
Куштыде ом керт, тиде мыйын волгыдо ончыкылыкем. Школ деч вара хореограф лияш шонем, – мане Анастасия Иванова.
Таче Анастасия ОГЭ-лан талын ямдылалтеш.
Чолга, тыршыше
Эвелина Антропова Йошкар-Оласе 2-шо №-ан школышто 11-ше классыште тунемеш. Уста ӱдыр школын чапшым тӱрлӧ конкурсышто нӧлта. Поснак почеламутым сылнын лудмо тӱрлӧ кӱкшытан конкурсышко чӱчкыдын ушна да эре гаяк ончыл верышке лектеш. Проект пашамат шукта, школышто волонтёр семынат тырша.
Эвелина 1-ше класс гычак Сеҥымашын XXX идалыкше лӱмеш тӱвыра полат пеленысе «Экзерсис» калык эстраде куштымаш ансамбльыш коштеш. А «Марий памаш» ансамбльыш кум ий ондак толын.
– Авамын тыршымыжлан кӧра таче марла сайын мутланем. Изинек усталык шӱлышеш кушкынам. Мураш-кушташ йӧратенам. Но таче мыланем эн чот кушташ келша. Сценыш лектам гын, чоным почын куштем.
3-шо класс гычак почеламутым марла сылнын лудмо конкурслашке ушненам да кызытат тушто шкем тергем.
«Марий памаш» ансамбльын коллективше икоян, чыланат ик еш гай улыт. Тыште самырык-влакым эре вучат, сандене толаш лӱдман, аптыраныман огыл. Эше кок ий ончыч гына мый эн самырык улам ыле, а таче мый дечем изирак-влак шукын коштыт.
Ансамбль дене пырля кундемнан тӱрлӧ районыштыжо, тыгак Москошто, Саратовышто лийынна. Кызыт ЕГЭ-лан чот ямдылалтам, сандене коллективыш икмыняр тылзе ом кошт, – мане Э.Антропова.
Таче Эвелинан тӱҥ шонымашыже – ЕГЭ-м сайын кучаш да тунемаш пураш.
Тиде кок ӱдыр коллективын ончыкылыкшо улыт. Чолгалыкышт дене ойыртемалтыт, тыршен тунемыт да кушташ йӧратат. Усталык корнышт тек умбакыжат волгыдо да тӧр лиеш.