21 июньышто Сеҥымашын XXX идалыкше лÿмеш тÿвыра полатыште марий йылме дене КВН-фестиваль эртен. Тушто Морко посёлкын «Свои», Советскийын «Ӱдыр-влак», Оршанкын «Яндар йÿк», ММЗ заводын да Марий тÿвыра рÿдерын «Кумыл» коллективышт таҥасеныт.
– Марий йылме дене тыгай фестивальым эртараш кумыл шукертак шочын, – палдарыш фестивальын ик организаторжо Александр Акилбаев. – Тудо ондакырак лийшаш ыле, пандемийлан кöра тачысе кече марте шуйнен. Туге гынат команде-влакым чумырымо, нунын дене ятыр пашам ыштыме. Сценарийым ончыч руш йылме дене ямдылыме, вара тудым марий йылмышке кусарыме. Тидлан марий йылмым да литературым туныктышо-влак декч полышым йодмо. Нунат ты пашашке кумылын ушненыт, тидыже куандара.
Фестивальын ик тÿҥ шонымашыже – кундемыштына марий йылме дене выступатлыше КВН командым чумыраш. Тудо кажне ийын эртаралташ тÿҥалеш манын, ÿшаныме шуэш. Тыге ме, районла гыч команде-влакым чумырен, КВН-ын лигыжым ыштен кертына. Шочмо марий йылме дене мыскара-влакым вияҥден, тудын ÿмыржым шуен кертына. Тыште теве мом эше палемдынем; мыскара кеч-могай ийготан еҥын кумылжым савыра. Сандене фестивальын эше ик задачыжлан самырык-влак коклаште марий йылмым кумдан шаркалымаш шотлалтеш. Нуно мыскара гоч шочмо йылмыштым пагалаш, аклаш, йöраташ да тудын дене вожылде кутыраш кумылаҥшаш улыт.
Кок шагат наре шуйнышо мыскара кас ик шÿлыш дене эртен. Кызытсе илышлан келшыше оҥай койдарчык-влак икте-весе кокласе кылым ончалаш, тудын нерген шоналташ таратеныт. Мыскараште шакше койышым ончыктымаш, тудын нерген мутланымаш лийын огыл, тидыже куандара. Участник-влак коклаште школышто тунемше, туныктышо, студент да пашам ыштыше еҥ-шамыч выступатленыт. Нунын марла кутырымыштат ойыртемалтын. Самырык-влак марла тÿкнылын ойленыт гын, кугурак ийготан-шамыч коклаште тыгайже шижалтын огыл.
Марий мыскаран ÿмыржö кужу лиеш манын, ÿшаныме шуэш. Тидлан, мутат уке, шуко пашам ыштыман, эн тÿҥжö – марла чын да раш кутыраш тунемман!
ММЗ-ын командыже фестивальыште икымше верым налын. Тудын капитанже – Дмитрий Новосёлов. Ты заводын пашаеҥже-влак тÿрлö мастарлык конкурсышко кумылын ушнат. Тылеч ончыч, шыжым, Йошкар-Олаште эртаралтше «Самырык пашаеҥ-влакын кубокышт» верч таҥасымаште выступатленыт. Тушто ММЗ-ын кок командыже вийжым терген. Тусо командылаште руш йылмым палыше еҥ-влак лийыныт, а КВН-лан марий йылме дене кутырышым чумыраш кÿлын. Тыге заводын эн тале марий мыскарачыже-влакым поген, команде чумырген. Дима студент годсек мастарлыкшым нöлта. Марий пединститутышто тунеммыж годымак КВН-ыште участвоватлен, тусо командын сборныйыштыжо лийын. Тунем пытарымеке, Йошкар-Оласе выпускник-влакын командыштышт выступатлен. Вара Йошкар-Оласе КВН командын сборныйышкыжо ушнен. Ты команде дене шуко вере Марий Эл республикын чапшым арален.
ММЗ командын участникше-влак КВН-лан кок арня наре ямдылалтыныт. Нунын артист койышышт, оҥай мыскарашт, марла сайын кутырымышт, пÿсö уш-акылышт, музыкальный улмышт кумылым савыреныт.
Морко посёлкысо «Свои» команде кокымшо вер дене палемдалтын.
Командыште Морко «Газпром» ЛПП-ын пашаеҥже-влак улыт. Культорганизатор Надежда Кузнецован палдарымыж почеш, тушто техслужащият, начальникат, газовик-шамычат выступатлат. «Такшым ме шке коклаштына тыгай сынан мероприятий-влакым эртарена. Тидлан фестивальын ик организаторжо Олег Ремизов мыланна полшен шога. КВН-ыште ончыкташ шкенанак эн оҥай мыскарана-влакым ойырен налынна», – мане тудо.
Советский посёлкысо 3-шо №-ан школын «Ӱдыр-влак» командыже кумшо верым налын. Тунемше ден туныктышо-влак, ик командыш чумырген, школ илышым мыскара гоч чолган почын пуэныт. КВН нерген тысе школышто англичан йылмым туныктышо Светлана Васильевна Игнатьева тыгерак мане:
– Школышто йоча-влак марла огыт кутыро, но шукынжо умылат. Сандене КВН деч вара шочмо йылме деке утларак шÿмаҥыт манын, ÿшаныме шуэш. Ты амал денак фестивальыш ушнаш кумылаҥынна.
Оршанке районысо «Яндар йÿк»
Оршанке посёлкысо шуко профилян колледжысе «Яндар йÿк» командыш 9 студент чумырген. Нунын коклаште ончыкылык воспитатель, физкультурым туныктышо, автомеханик-влак улыт. Колледжыште педагог-организаторын сомылжым шуктышо Вера Юрьевна Николаеван палдарымыж почеш, командыште ялыште шочын-кушшо, марий йылмым палыше ÿдыр-рвезе-влак лийыныт. Нуно марла сайын кутырат, сандене КВН-лан ямдылалтме годым нелылык лектын огыл. Сценарийым ямдылыме шотышто организатор-влакын надырыштым палемдышт. Нуно темым ойырымо, сценыште шкем кузе кучымо шотышто ятыр полышым пуэныт.
Марий тÿвыра рÿдерын «Кумыл» командыжын участникше-влакын марла раш да чаткан кутырымышт келшен. Тидыже кеч-могай марий еҥын кумылжым нöлтен, шонем. Но сценарийын содержанийже шотышто утларак тыршыман ыле, очыни.
Иван Речкинын фотожо-влак.