Пытартыш жапыште соцкыллаште самырык ӱдыр Полина Калугинан йоҥгалтарыме мурыжо-шамыч койыт. Кушеч ты ӱдыр? Кузе муро аланыш толын? Тидын да моло нергенат тудын дене мутланышна.
Усталыкше изинек палдырнен
Полина Параньга кундем Памашъялыште шуко йочан ешыште шочын-кушкын. Тудын кок шӱжарже да шольыжо улыт. Ӱдыр Кугу Пумарий кыдалаш школ деч вара Йошкар-Оласе медицине колледжыште профессионал шинчымашым налын. Эше икымше классыш коштмыж годымак «Юный художник» кружокышто шуаралтын. Тыгак школысо тӱрлӧ мероприятийыште мурен, конкурсышто мастарлыкшым терген. Кызыт Йошкар-Оласе Рӱдӧ эмлымверыште медшӱжарлан тырша.
– Мый мурылан изинек шӱман кушкынам. Тӱҥалтыш класслаште тунеммем годым ялысе клубышто чӱчкыдын концертлаште муренам. Калык ончылно йоҥгалтарыме икымше мурем тачат сайын шарнем. Ты муро йоча-шамыч коклаште поснак чот палыме «От улыбки» маналтеш. Тудын деч вара школыштат мураш йодаш тӱҥалыныт. Тыге музыклан шӱмаҥынам, – ойла П.Калугина.
Шке воза, шке мура
Кызыт Полина мурылан почеламут корнылам шкеак келыштара. Ойлымыж почеш, ты сомыллан кенеташте пижын. Вуйыштыжо сылне корно-влак чӱчкыдын пӧрдыныт, тыге нуным почеламутыш савырен. Варажым мурым шочыктен. Тыге ӱдырын репертуарыштыже «Омо ден» икымше муро лектын.
– Ты мурсаскам эше 2023 ийыштак возенам, но калык ончыко лукташ вожылынам. Садлан идалык эртымеке веле тидым ыштенам. Самырык автор Христина Александровалан таум ойлынем. Тудын полшымыж дене кугу шонымашем илышыш шыҥдаренам. Христиналан кӧра сылне муро шочын, – каласкала ӱдыр.
Самырык ӱдырын репертуарыштыже тачысе кечылан кум муро погынен. Шукерте огыл Полина шӱжарже дене шкешт нерген такмакым келыштарен возеныт. Мутым Христина Александрова возен гын, семжым калыкыным ойыреныт.
Полина тыгак марий эстрадысе мурызо-шамычын мурыштым колышташ йӧратем, мане. Поснак Ирина Якаеван, Володя Матвеевын, Йорга Качын творчествышт келшыме нерген ойлыш. Нуно тудым у муро-влакым шочыкташ, усталыкым вияҥдаш кумылаҥдат. Тылеч посна ӱдырын лишыл еҥже-шамыч кумылжым эреак нӧлташ тыршат. А тидыже кеч-могай сомылым тӱҥалмаште эн кугу полыш да шӱкалтыш. Тугеже Полина Калугинан лӱмжӧ калык ончылно йоҥгаш тӱҥалеш манын ӱшанена!
П.Калугинан альбомжо гыч налме фото.