25 октябрьыште Йошкар-Оласе Самырык-влаклан полатыште марий КВН команде-влакын регион кокласе фестивальышт лиеш. Тудым Республикысе тӱвыра, печать да калык-влакын пашашт шотышто министерствын полшымыж дене Марий тӱвыра рӱдер эртара.
Угыч чылаштым ушыман
Марий КВН-ын шкешотан улмыжо, тудын историйже, тений эртаралтшаш фестивальын ойыртемже нерген Марий тӱвыра рӱдерын специалистше, кундемыштына палыме чолга еҥ Сергей Карпов дене мутланенна. Тудо каласкала:
– Марий КВН-ын историйже 2000 ий апрельыште тӱҥалын. Тудлан негызым пыштышылан тӱвыра, мер да политике пашаеҥ Наташа Пушкинам шотлаш лиеш.
Тунам Марий пединститутысо да МарГУ-со «Рвезылык» студент ушемын «СТЭМ» командыже (капитанже Наташа Пушкина) да Шкетан лӱмеш Марий драме театрын «Марий шанче-влак» командыже (капитан – Роман Алексеев) участвоватленыт. Мыскара пайрем театрын изи залыштыже эртен. Тылеч вара «СТЭМ» команде «Марий ушем» пеленысе лийше студент пӧлкан «Тура марий» командыже да Оршанке посёлкысо И.К.Глушков лӱмеш педколледжын «У марий» командыж дене вашлийын.
А 2003 ий мартыште Йошкар-Оласе Курчак театрыште марий КВН республик кӱкшытыштӧ эртаралтын. Тунам кум команде весела койышым, мыскара гоч тӱрлӧ пӱсӧ йодышым нӧлталын да пӱшкылын моштымыштым ончыктен. Икымше верым Морко район Изи Кушна ялысе «Кушна кундем» команде налын ыле. Палемден кодымо шуэш, Шернур районысо Лажъял гыч «LM» командым. Тудо кум гана марий КВН-ыш ушнен да мастарлыкшым кӱкшын ончыктен. Командын эн самырык участникше 12 ияш Илья Воронов лийын. Кызыт тудо – СВО-што.
Шымше марий КВН 2012 ийыште эртаралтын. Тушто вич команде участвоватлен. Пеш виян участник-шамыч лийыныт. Икымше верым «Кугарня» газетын «10-КА» командыже сулен. Тылеч вара 10 ий марий КВН нерген мондымо. Да 2022 ий 23 июньышто Сеҥымашын XXX идалыкше лӱмеш тӱвыра полатыште «КВН Республики Марий Эл» регионысо мер организаций мыскара пайремым эртарен. Тушто Марий тӱвыра рӱдерын «Кумыл» командыже участвоватлен. Сеҥышыш лекме огыл, но шкенам сайын ончыктенна манын кертам. Кугу тау сценарийым, оҥай мыскарам возымылан «10-КА» командын капитанже Игорь Поповлан.
2022 ийынак шыжым марий Тӱвыра рӱдерын коллективше КВН-ым эртараш шоненна. Но мемнам Морко район администрацийын тӱвыра пӧлкаже ончылтен. 16 ноябрьыште Морко тӱвыра да каныме полатыште пеш сай мероприятийым эртареныт, шуко оҥай мыскара йоҥген ыле. 18 ноябрьыште Йошкар-Оласе самырык-влаклан полатыште 9-ше марий КВН лийын. Тунам икымше верым Морко посёлкысо «РЦКД» команде налын.
А 2023 ийыште 10-шо марий КВН Пошкырт кундем Мишкан селаште лийын. Тунам икымше верым Мишкан район Ирсай ялысе «Ирсай подкогыльо» сулен.
Самырык-влак, палемдыме жап, оҥай теме, клуб
Тенийысе марий КВН кодшо ийласе деч палынак ойыртемалтеш. Ончыч ончыч тӱрлӧ ийготан участник-влак ушненыт гын, тений командыште 30 ияш марте 3 еҥ лийшаш. Чылаже командыште 10 еҥ деч шуко лийшаш огыл. Кажне номерлан палемдыме жап уло: 7 минут деч шуко выступатлаш ок лий.
– Разминке поснак ойыртемалтеш. Кажне команде кум йодышым ямдылышаш. Участник-влаклан вашмутым муаш 30 секунд ойыралтеш. А ешартыш йодыш-влакым команде-шамычлан Марий Элын палыме мыскарачыже, артистше-влак пуат.
КВН-ын темыже: Марий патыр-влак. «Пол…Па…Ак…Ир…Чу…Ма…Марий патыр улына» шкешотан ребуслан вашмутым ямдылена.
Фестиваль кышкарыште Марий тӱвыра рӱдер пелен «Весела кӱдыр» марий КВН клубым почмо шотышто положенийыш кидпалым пыштена. Командын капитанже-влак дене ончыкшым ыштышаш паша нерген мутланена. Вет КВН – тиде жапым веселан эртарыме, чон кумыл паша веле огыл, тиде марий йылмым аралымаште ик йӧн, – ойла Сергей Карпов.
КВН толкын кундемыштына сайынак вияҥеш. Тушко кугыеҥ веле огыл, йоча-влакат кумылын ушнат. Шукерте огыл Тула областьыште йоча КВН команде-влакын XIV Всероссийский фестивальышт эртаралтын. Тушто Российысе 60 регион гыч да Беларусь Республике гыч толшо 145 команде участвоватлен. Йошкар-Оласе «Мультискилл» команде «КВН.ДЕТИ» телепроектыш логалын. А «Дети Марий Эл» команде КВН-ысе Юниор-Лигын тургымыштыжо мастарлыкшым ончыкташ тӱҥалеш. А молан марий йоча-влаклан КВН-ыш ушнаш огыл?! Тыгай йӧнымМмарий тӱвыра рӱдер пуа. Фестивальыш ушнаш кумылан команде-влак йодмашым, видеоматериалым 26 сентябрь марте рӱдерын электрон почтышкыжо mari-centr_konkurs@mail.ru колтен шуктышаш улыт.