18 ноябрьыште Йошкар-Олаште Самырык-влакын полатыштышт Марий КВН гӱжлен. Тушто куд команде шке вийжым терген. Икымше верым Морко посёлкысо тӱвыра да каныме рӱдерын «РЦКД» командыже сулен, кокымшо верым Йошкар-Оласе «Кечан кече» команде налын, Шернур районысо икымше номеран школын «Нурвел» командыже кумшо лийын.
Тылеч посна тӱрлӧ номинацийыште ойыртемалтше участник-влакым палемденыт. «Эн ӱшанле капитан» номинацийыште «Нурвел» командын капитанже Дмитрий Веденькин лийын. «Мыскараче пӧръеҥ» – «Кечан кече» командын чолга участникше Илья Воронов, «Мыскараче ӱдырамаш» – «РЦКД» командын участникше Алевтина Иванова. «Йолташики» команде «Кугарня» газетын ӱшан пӧлекшым сулен. «Эн пӱсӧ мыскара» номинацийыште Волжский кундемысе «Шийгорно» командын участникше-влакым палемденыт гын, ончышо-влакын кумылыштым савырыше коклаште «12 подкогыльо» командым ойыреныт.
Морко-влак, браво!
Морко посёлкысо «РЦКД» командыште тӱвыра аланыште тыршыше-влак участвоватленыт. Тиде Морко районысо клуб системе-влакым вуйлатыше В.А.Дмитриев, методический пӧлкам вуйлатыше Л.Ф.Кириллова, автоклубым вуйлатыше А.А.Иванова, художник-декоратор А.З.Филатов, методист-влак Р.З.Аюпов ден Д.В.Павлова. Нуно ты кундемын тӱвыражым, йӱлажым тӱрлӧ конкурсышто чӱчкыдын ончыктат. КВН-лан сценарийым ямдылыме шотышто ты тӱвыра полатын пашаеҥже-влак чылан пырля тыршеныт. Кызытсе илышлан келыштаралтше мыскара-влакым илыш гыч налыныт. Тидын нерген Дина Владимировна тыгерак палдарыш:
– КВН-ын тӱҥ темыже – тӱвыра ӱвыра поянлык огыл. Тидым, очыни, кажныже шке семын умыла. Мый гын тыге умылем: тӱвыраште ӱвыра гай ме тыршена. Тидыже такшым кажне тӱвыра пашаеҥлан келшен толеш.
Олашке толмо деч ончыч Морко тӱвыра пӧртышто КВН эртен. Вич команде гыч кокытшым тышке толаш ойыренна. Мемнан дене икымше гана тыгай КВН эртаралтын.
Морко-влак, браво! Тендан мастарлыкланда да тӱняумылымашланда куаныман! Шуктымо сомылдам мыскара гоч почын пуымыланда кугешныман. Ончыкыжымат мыскара кумылда тендам волгалтарен шогыжо да у кӱкшытыш шуаш полшыжо.
– Сценарийыште Карай кундемлан лишыл теме-влакым тарватенам. Тыгак тысе еҥ-влакын чоныштышт могай шижмаш озаланымыланат эҥертенам. Мутат уке, йолташ-влакын ойыштымат шотыш налынам. Икманаш, сценарийлан идейым ме чылан пырля ямдыленна, а марла чын каласымыжлан мый вуйын шогенам, – мане Н.Д.Ильина.
«Шийгорно» фольклор ансамбльын репертуарже марий муро ден куштымаш-влаклан поян. Сандене мыскара конкурсышто марий шӱлыш поснак озаланен. Мутлан, налаш кеч нунын марий тувырыштымак. Ты ансамбльыш коштшо вате-влак марий тувырым кажне гаяк номерлан келыштареныт. Нунын пайрем концерт-влаклан икмыняр костюмышт уло. Тидланже Людмила Аркадьевна Савиновалан тауштат.
Карайысе калык театр мыскара шӱлышан конкурслаште чӱчкыдын шке мастарлыкшым терга. Ик гана веле огыл «Кугарня» газет редакцийын эртарыме «Воштылаш, товата,т сулык огыл!» конкурсышто лийыныт. Эртысе КВН-ланат ты театр дене пырля ямдылалтыныт.
Марий кугыжаныш университетын «Йолташики» командыже ончаш толшо кажне еҥым, очыни, шке самырык пагытышкыже ик татлан пӧртылтен. Вет ты командын участникше-влак але студент улыт. Тушто куд еҥ лийын, ик рвезе йӱк дене полшен.
Мыскараштат ӱдыр-рвезе-влакын кызытсе илышыжым почын пуа. Ты командын капитанже Ирина Петрова тыгерак каласкалыш:
– Командыште марий да руш йылмылам туныктышо лияш ямдылалтше ӱдыр-рвезе-влак улына. Шукынжо икымше курсышто тунемыт, марла сайын мутланат. Тидыжак мыйым, командым чумырен, марий КВН-ыш ушнаш кумылаҥден. Мыскара шотышто тӱрлӧ идейым кычалынна. Кажне кечын манаш лиеш вашталтын. Садлан кажне кечын сценарийышкына у койдарчыкым, шыргыжмашым пуртенна. Ме самырык улына, темыжат мыланна келыштаралтын. Самырык-влак каналташ, дискотекыш кошташ кумылан улына. Сценарийыштат тидым ужаш лиеш. Ямдылалтме годым шукыж годым чылан пырля вашлийын, репетироватлен кертын огынал. Сандене кастене веле южгунам вашлийын сеҥенна.
Шернур посёлкын «Нурвел» командыже кугу делегаций дене толын. Тыште тунемше, туныктышо, тӱвыра да мер пашаште ойыртемалтше еҥ-влак погыненыт. Шернур велын участникше-влак шке кундемышт дене кугешнымыштым ончыктеныт. Тидым тысе виян «Лукоз» фирмын пашаже, Йыван Кырлан «Путёвка в жизнь» фильмыште войзалтмыж дене почын пуэныт. Сценарийым нуно почеламут семын келыштареныт да тудым реп формат дене модын ончыктеныт. Ты командыштат икоян, марий тӱвырам пагалыше да йӧратыше еҥ-влак чумыргеныт. Командылан пырля чумыргаш, репетироватлаш нелырак лийын. Вет участник-влак Шернур районын тӱрлӧ ялже гыч улыт. Южгунамже тунемше-влак репетицийлан кӧра автобус дечат кодыныт, вара нуным ача-авашт кастене машина дене лӱмын налаш толыныт.
Ты командын капитанже Д.Веденькин Шернур районысо администрацийлан автобусым олаш толаш пуымыжлан, тыгак ача-ава-влаклан ямдылалтме годым шкешотан полышым пуымыштлан таум ыштыш. «Тыгай мыскара конкурс деч мом вучет?» йодым тудын деч. Вашмут тыгайрак лие:
– Ончыкыжымат ты толкынышто вияҥаш да шке кундемыштынат тыгай конкурсым эртараш оҥай лиеш ыле. Тачысе конкурс деч вара, мутат уке, иктешлымашым шке коклаштына ыштена. Умбакыже молан тӱткышым утларак ойыраш кӱлмым палемдена. Марий КВН-ыште илышын сай йыжыҥжым утларак ончыктыман, очыни. Лач вурсымо, койдарыме дене ончыко каяш огеш лий.
Морко районын вес «12 подкогыльо» командыштыже Кӱчыкэҥер, Коркатово да Чодыраял клуб-влакын пашаеҥышт лийыныт. Тыгак Арын, Коркатово да Эҥерсола книгагудын пашаеҥже-влак ушненыт. Ты команде шке мыскараже-влакым марий кочкыш дене кылден. Лӱмымат «12 подкогыльо» манын ойырен. Тидым нуно 12 числан подкогыльо пелен йоҥгыдын шоктымыж дене палемдат. Сценарийым ямдылыме шотышто нунылан кугу полышым Елена Викторовна Семёнова пуэн, маньыч. Участник-влак подкогыльымат тӱрлен конденыт. Мыйымат сийлышт, шокшо чайым йӱктышт. Тыглай мыскара ден КВН коклаште ойыртем кугу, нелылыкат уло. Но ты командын участникше-влак икте кодде «мыскара илышым шуяш полша» манын пеҥгыдемдышт.
Йошкар-Оласе «Кечан кече» командыште тӱрлӧ аланыште тыршыше-влак, тыгак тӱрлӧ районышто илыше-влак улыт. Участник-влак интернет гоч репетицийым эртареныт, вет паша график кажнын ойыртемалтеш, а КВН-лан ямдылалтман. А сценарийыш илышыште вашлиялтше тӱрлӧ оҥай случайым, марий калыклан келшыше мыскарам пуртеныт. Чыла тидыжым «Илышнаже мемнан – КВН» манмышт дене пеҥгыдемденыт. Ты команде нарынче тӱсан формышт дене чылт кече гаяк улыт ыле: шокшо, волгыдо да поро. Нуно сценыш лекме деч ончыч шке коклаштышт «кайфануть» манын кутырен келшеныт. Шонкалаш таратыше мыскарашт, сценыште шкем куштылгын кучымышт да артист койышышт дене кокымшо верым суленыт.
Организатор-влакын палемдыме «Тӱвыра ӱвыра поянлык огыл» темым кажне команде шке семын ончыктен. Кажныжын шонымашыже тӱрлӧ, но тыгодым тӱвыран улмыжо калыкнам икояным ышташ кумылаҥда, тудым пагалаш да йӧраташ туныкта.
