22-23 июньышто Марий Турек район Марий Купто ял воктенысе «Ӱжара» каныме базыште «Платуновский пленэр» эртаралтын.
Тидын нерген Марий Турек районысо В.П.Мосолов лӱмеш краеведений тоштерым вуйлатыше Раиля Мухаметханова каласкалыш:
– Мемнан районна уста сӱретче-влаклан поян. Кундемыштына шочшо 20 утла еҥ профессиональный художниклан пашам ышта. Нуным ты сымыктышлан землякышт Александра ден Михаил Платуновмыт кумылаҥденыт, манаш келшен толеш. Вет кызыт лӱмлӧ шӱжар ден изан сӱретыштым Третьяковский галерейыштат ончыктат, надырышт нерген ятыр вере палдарыме. Но шочмо кундемыштышт художник-влакын лӱмышт ӱмылыштӧ лийын. Мондалт кодшо уста еҥын лӱмжым пӧртылташ ятыр ий шонен коштынам. Тидым ыштен кертмылан куаненам.
Платуновмыт лӱмеш пленэрыш тӱрлӧ ийготан 40 утла еҥ толын. Нунын коклаште Йошкар-Оласе художественный училищын «Живопись» пӧлкаште тунемше 20 студент лийыныт. Йошкар-Ола гыч уста художник А.С.Алексеев шке вуйлатыме студийже гыч еҥ-влакым ӱжын. Татарстан гычат сӱретче-влак ушненыт. А почётан уна-влак коклаште Россий художество академийын академикше, Татарстан Республикысе сымыктышын сулло пашаеҥже Ф.Г.Халиков, учёный-историк, журналист, этнолог, краевед Р.А.Бушков лийыныт.
Марий Купто воктене каныме базым самырык амалкалче Станислав Делянов келыштарен. Тыште тудо сценым шындаш, этноялым ышташ шона. Участник-влаклан ты вершӧр келшен. Пленэр пытен веле, а тушко вес ийын толаш кумылан-влак йодмашымат пуаш тӱҥалыныт.
Ме шкенан задачынам шуктена – Платуновмытын лӱмыштым кызытсе жапыш пӧртылтена да нунын дене самырык тукымым палдарена.
Пленэр мучаште художник-влакын выставкыштым ыштенна. Сай игече ден поро кумыл участник-шамычлан мотор вершӧрым ончалаш да шке радынаштышт сылнештараш полшеныт.
Мероприятийым Марий Купто тӱвыра пӧрт пеленысе «Ӱжара» фольклор ансамбль (вуйлатышыже – Г.С.Тихонова) сӧрастарен. Чылажат моторын, ласкан да радам почеш эртен. У пленэрыште вашлиймеш!
Ынде Марий Купто ялысе мотор вершӧрна, Куптинке эҥерна сӱретче-влакын радыналаштышт волгалтыт.
Эльвира Терентьева.
