Марий Эл мотор пӱртӱсшӧ, поян чодыраже, ший вӱдан эҥер ден ерлаж дене Российын ик эн ару кундемжылан шотлалтеш. Тыште ятыр янлык ила да тӱрлӧ кушкыл кушкеш. Ужар чодыра дене марий мландына чаплана. Тудо республикнан пелыж наре кумдыкшым айла. Тушто тӱрлӧ емыж, пӱкшерме ден локама кушкыт. Чодыра тӱрыштӧ але пасулаште поҥгым але саскам погаш лиеш.
Кумда чодыра гоч ару эҥер-влак йоген эртат, мотор ерла шарленыт. Марий Элын икмыняр ужашыже Юл эҥер воктене верланен. Географийысе картым ончалаш гын, чодыра коклаште верланыше ер моткоч шуко. Чылаже 600 утла ерым шотлат. Нуно ару да келге улыт. Тыгак кундемна памашлан поян.
Кужэҥер велне – вӱдшуҥгалтыш
Мутлан, Кужэҥер районым памашан кундемлан шотлат. Кужэҥер посёлко воктене верланыше «Лисья гора» памаш-комплекс уна-влакым поснак сымыстара. Тыште рывыж-шамычын илемышт ятыр улмылан кӧра комплекслан тыгай лӱмым пуымо. Памаш вӱд келге корем пундаш гыч йоген лектеш да тӱрлӧ шыгыр верла гыч, умбаке шуйналтын, мучко шке йогынжо дене «куржеш». Тудын модын йогымыжым ятыр жап ончен шогал лиеш. Корем пундашыш тошкалтыш дене волыман. Кӱкшакаште еҥ-шамычлан шогалаш верым, ӱстембал ден теҥгыл-влакым келыштарыме. Тыгак футбол дене модаш кумдык да тулотылан посна верым ыштыме. Вӱд лекме верын пырдыжше шун тӱсан. Верын-верын пырдыжыште кӱ моклака-влак верланеныт. Тысе вӱд вӱргеньылан поян. Садлан тудым эмлышылан шотлат. Поснак пагар, шоло чер дене орланыше-влаклан пайдале. Тыгак комплекс кумдыкышто тазалыкым пеҥгыдемдаш полшышо икмыняр кушкылын шочмыштымат палемдыме.
«Лисья гора» комплекс калык коклаште утыжым палыме огыл гынат, еҥ-влакын ойлымышт почеш, турист-шамыч тышке эреак толыт. Тудо пӱнчер коклаште мардеж да уто йӱк-йӱан деч пуйто шылын шинчын. Йырым-йыр куэ, кож-влак кушкыт, кажне йолтошкалтышыште – куткышуэ. Тыште шып, тымык да волгыдо. Садланак ятыр еҥ-влак каналташ ты верым ойыра.