Ноябрь кыдалне Екатеринбург олаште «Нацийын королевыже» моторлык да талант конкурс икымше гана лийын. Тудым Свердловск областьысе национально-культурный объединений-влак ассоциаций Екатеринбург ола администрацийын полшымыж дене эртарен.
Ты оласе Урал калык-влакын пӧртыштышт тӱрлӧ национальностян еҥ-шамычым ушен шогышо 80 утла организаций шотлалтеш. Нунын икоян улмыштым ончыкташ ты конкурс эртаралтын.
Тушко 16-52 ияш 19 участнице ушнен. Нунылан национальный тувыр, муро, куштымаш, почеламут гоч шке калыкыштын чон моторлыкшым почын пуаш кӱлын.
Марий калыкын койыш-шоктышыжым, культуржым, йӱлажым В.Ваниева ончыктен. Виктория – эрвелмарий ӱдыр. Тудо Пошкырт кундем Калтаса районысо Кожлаялеш шочын-кушкын. Изиж годсек мураш-кушташ йӧратен, ялысе клубышто концертлаште эре выступатлен. Школышто тӱрлӧ конкурсыш ушнен.
Школ деч вара Свердловский областной фармацевтический колледжым тунем пытарен. Кызыт Екатеринбург олаште ик аптекыште фармацевтлан пашам ышта.
Виктория яра жапыштыже Свердловск областьысе марий-влакын «Урал мари» национально-культурный автономийышкышт кумылын коштеш. Тыгак «Пиал» ансамбльыште мура да кушта.
Каласыман, В.Вани-ева тений майыште Екатеринбург олаштак «Мисс Евразия» конкурсышто мастарлыкшым терген. Тушто лу тӱрлӧ калыкын шочшыжо национальный кочкышым ыштымаште, национальный вургемым чиен коштмаште, куштен-мурымаште таҥасен. Виктория Марий Элын миссше лийын.
Ончыкшым Викториям эше ятыр сеҥымаш вуча манын ӱшанена.
В.Ваниеван альбомжо гыч налме фото.