Тений мемнан Марий Элна И.С.Палантай лӱмеш тӱвыра да сымыктыш колледжын академический музык факультетшылан 90 ий, тыгак икымше марий композитор Иван Степанович Ключников-Палантайын шочмыжлан 135 ий теммым палемда.
Кузе шочын?
1931 ийыште 3 апрельыште МАО-лан 10 ий темме вашеш Калык Комиссариатын Коллегийжын пунчалже почеш Марий драмтеатрын драматический ден музыкальный студийже пелен Марий сымыктыш техникум ышталтын. 16 сентябрь гыч студент-влакым погымо нерген увертарыме, 1 октябрште техникум пашам ышташ тӱҥалын.
Икымше директор Ксенофонт Архипович Четкарёв лийын. Тудым Озаҥысе Восточно-педагогический институт деч вара Йошкар-Оласе драмтеатрым вуйлаташ колтеныт. Театрлан артист-влакым ямдылыман улмаш, сандене тыгай техникумым почмо. Завучлан И.С.Палантайын тунемшыже Алексей Искандарович Искандаров шогалын.
Икымше педагог-влак кокла гыч Клавдия Николаевна Морозовам, Лев Николаевич Сахаровым, Яков Андреевич Эшпайым, Пётр Никифорович Никифоровым палемдыман. Икымше выпускник-влак К.А.Смирнов, А.В.Александрова, А.Ф.Коротков, Г.С.Гусев, П.А.Куприянов да молат лийыныт.
1936 ийыште композитор И.С.Палантайын колымыжлан лу ий теммылан Марий сымыктыш техникумлан тудын лӱмжым пуымо. 1937 ийыште ты тӧнеж Марий музыкально-театральный училище маналташ тӱҥалын, 1941 ий гыч – И.С. Палантай лӱмеш Марий музыкальный училище.
Ты училищын выпускникше-влак Российысе тӱрлӧ вузышко тунемаш пурат. Республикысе музыкальный элитына чыла гаяк тиде училищын выпускникше-влак улыт: композитор-влак Эрик Сапаев, Иван Молотов, Виталий Алексеев, Дмитрий Кульшетов, Владислав Куприянов, Виктор Данилов, Алексей Яшмолкин, Валерий Кульшетов, Вениамин Захаров, Юрий Евдокимов, Сергей Маков, Анатолий Незнакин, Иван Егоров; исполнитель-влак Виталий Шапкин, Галина Окунева-Ластовка, Светлана Сушкина, Владимир Ромашкин да молат; музыковед-влак Олег Герасимов, Роза Артищева, Ираида Яшмолкина, Александр Маклыгин, Майя Мамаева.
Чапле концерт
15 ноябрьыште Э.Сапаев лӱмеш опер да балет театрыште Марий тӱвыра да сымыктыш колледжын академический музык факультетын юбилейный концертше лийын. Тушто колледжын тунемшыже да ожнысо выпускникше-влак выступатленыт, мастарлыкыштым ончыктеныт. Училищын туныктышыжо-влак тӱрлӧ грамот дене палемдалтыныт.
Училищым саламлаш Озаҥ консерваторий гыч лӱмлӧ еҥ-влак профессор, искусствоведений доктор Александр Маклыгин, Российын да Татарстан Республикын калык артистше, профессор Рубин Абдуллин, профессор Александр Протасов, тыгак вес кугу олалаште илыше музыкальный училищын икмыняр выпускникше: Моско гыч Александр Селиванов (баян), Санкт-Петербург гыч Елена Таникова (скрипке), Озаҥ консерваторийыште тунемше Анастасия Токтарова (домр) да молат — толыныт.
Училищын выпускникше-влак Э.Сапаев лӱмеш опер да балет академический театрыште пашам ыштат. Эльвира Гурьева, Елена Никитина, Павел Крючко сылнын мурымышт дене куандарышт.
Колледжын кызытсе студентше-влак шке мастарлыкыштым ончыктышт: Мария Орзаева (скрипке), Егор Карпочев (фортепиано), Алиса Кривошеева (мурызо), Ирина Ключникова (мурызо), Константин Шарнин (баян). Концертым колледжын симфонический оркестрже (вуйлатыше Александр Андрианов) да академический хоржо (вуйлатыше Кирилл Тихонычев) мучашленыт.
Концерт академический музык факультетын лӱмгечыжлан пеш сай музыкальный пӧлек лийын. Тенийысе неле жапым ончыде, музыкант-влак уло мастарлыкыштым калыклан ончыктеныт. Академический музык факультетлан у кугу сеҥымашым да чыла сайым тыланена.
Наталья Мушкина, МарНИИЯЛИ-н пашаеҥже.
Евгений Никифоровын фотожо-влак.
