Поро жапда лийже, «Кугарня» газетын коллективше. Тиде серышым Параньга район Памашъял гыч Тамара Фёдоровна Калугина воза. Мый Памашъял книгагудышто 49-ше ий библиотекарьлан ыштем. Керосин лампе тул дене пашам ышташ тӱҥалынам, а ынде, 73 ияш улам гынат, компьютер, смартфон дене пашам виктарен колтем.
Илыш ончыко кайыме дене книгам лудшо-влак шагалем толыт. Кызыт Интернет уло, тушто чыла муаш лиеш. Но полко гыч книгам налын, кÿлеш шомакым шке кычалын муат гын, тидым нимо денат таҥастараш огеш лий.
Мый ÿмырем мучко ойырен налме пашамым шуктем. Икымше класс гычак сылнымутан книгам лудаш тӱҥалынам. Мемнан тунемме жапыште марий школышто руш йылме да литератур деч моло предмет-влакым марла тунемынна. А могай поян ыле библиотеке, мыняр шуко улыт ыле марла книга-влак. Н.Носовын «Витя Малеев школышто да мöҥгыштыжö», А.Гайдарын «Чук ден Гек», А.Пушкинын «Капитан ÿдыр», Л.Толстойын ойлымашыже, А.Островскийын пьесыже-влак, Н.Островскийын «Вурс кузе шуаралтын» романже да шуко моло произведений-влак марлаҥдыме лийыныт. Марий автор-влакын лукмо книгаштат моткоч шуко ыле. З.Каткован «Кушто улат, пиалем?», В.Ивановын «Тÿтан», «Арслан» романже-влак, самырык-влаклан возымо повестьше-влак лудшо еҥын кумылжым савыреныт. 70-ше ийлаште библиотекыш идалык жапыште чылаже 600-700 у книга пурен. Марий книга издательствын савыктен лукмо у книга-влакым эн ончычак библиотекылан пуымо.
Молан чыла тидым воза манын шонеда докан. Чаманен каласаш логалеш, кызыт лукмо шуко марла книга библиотекыш огеш логал. А книгам кызыт утларакше илалше-влак лудыт. Книгалан толыт, а мый нуным нимо дене куандарен ом керт. 2015 ий годсек «Ончыко» журналат ок тол. «Марий Эл» ден «Кугарня» газетлам почто гоч шке окса дене налам.
Ынде 1 февраль гыч «Ончыко» журнал, «Кугарня», «Марий Эл» да «Сурт-пече» газет-влак толаш тӱҥалыныт. Лÿмын библиотекылан подпискым Никандр Семенович Попов ыштен. Газет гоч Никандр Семеновичлан лудшо-влак лÿм дене пеш кугу таум ойлем.
Ала эше поро чонан еҥ лектеш да ик-кок марла книгам библиотекылан ойыраш кумылаҥеш манме шонымаш «Кугарня» газетыш возаш таратыш.
Памашъял книгагудышто. Т.Ф.Калугина библиотекыш толшо Т.В.Калугина да В.Н.Мосолова дене пырля.