манеш Марий кугыжаныш университетын нылымше курсышто тунемше курыкмарий ӱдыр Алевтина Ильина. Ӱдыр марий йылмым да йот йылме-влакым (финн, англичан) туныктышо лияш ямдылалтеш. Шукерте огыл Аля «Лингва-территория» фестивальын курыкмарий йылме секцийыштыже моло ӱдыр-рвезе дене пырля шочмо йылме, тӱвыра да калык дене палдарен.
«Лингва-территория» фестиваль тӱрлӧ калык, йылме-влак дене палымым ышта. Тений 18 секций пашам ыштен. Мый кумшо ий почела курыкмарий йылме секцийыште лийынам. Мария Филиппова, Алина Белова, Юрий Минюков дене пырля курыкмарла муренна, куштенна, олыкмарий ден курыкмарий йылмыла коклаште ойыртемым ончыктенна. Секцийышкына толшо-влак шукын ыльыч. Тидыже мемнам моткоч куандарен», – ойлаш тӱҥале самырык ӱдыр.
Алевтина Курыкмарий район Пайскырык селаште шочын. Тысе школым тунем лекмеке, Марий кугыжаныш университетыш тунемаш пурен.
«Школышто тунеммем годым тӱрлӧ мероприятийлаште участвоватленам, шуко гана вӱдышӧ лийынам. Тыгак шочмо йылме дене олимпиадылаш коштынам. Курыкмарий йылмым туныктышем-влак Нина Виссарионовна Тюпаковалан да Наталия Мануиловна Павловалан тауштем. Нуно шочмо йылмынам да калыкнам йӧраташ туныктеныт. Школышто тунеммем годымак мый кӱсле дене шокташ тунемынам», – умбакыже каласыш Алевтина.
Пайскырык школышто Владислав Куприянов лӱмеш Микрӓк сымыктыш школын филиалже уло. Лач тушто нылымше гыч кандашымше класс марте Аля кӱсле дене шокташ тунемын. 2014 ийыште Пайскырык да Эмäн школлаште тунемше-влак Сочи олаште эртаралтше фестивальыште кӱсле дене шоктымо мастарлыкыштым ончыктеныт да икымше верым налыныт. Нунын коклаште Алят лийын.
«Молан умбакыже музыкальный направлений дене тунемаш каен отыл?» йодышемлан, ӱдыр тыгерак вашештыш: «Мый марий калыкем йӧратем, сандене шке йылмылан келшыше направленийым, профессийым ойырен налынам. Кызыт тидын деч посна тӱҥалтыш класслам туныктышо лияш ямдылалтам. Теве шукерте огыл шочмо школыштем практикым эртенам. Тушто йоча-влаклан марий йылме ден литературым туныктенам, шымше классым вуйлатыше лийынам».
Алевтина кидпашалан шӱман. Школышто тунеммыж годым аваж дене пырля муно шӱм гыч тӱрлӧ поделкым ыштылын. Ӱдыр пидаш да ырес дене тӱрлаш йӧрата. Но кызыт йӧратыме кидпашалан шуко жапым ойырен огеш керт. Вет Алевтина иканаште кок вере тунемеш.
Аля семын шочмо йылмым йӧратыше самырык-влакым пытартыш жапыште шагалрак вашлияш логалеш. Ӱдырын калыкше верч чонжо йӱла. Тунем лектын, изи йоча-влаклан шочмо йылмым туныкташ кумылжо огеш йом манын ӱшанена.