Марий калык конгресс исполкомын еҥже-влак республикысе тӱвыра, печать да калык-влакын пашашт шотышто министр К.Иванов дене вашлийыныт.
Тӱҥ шотышто тачысе паша лектыш нерген каласкалыме, ончыкыжым могай корно дене каяш шонымым лончылымо, кушкын толшо тукым мер илышыште чолгалыкым утларак ончыктышт манын, мом ыштышашым палемдыме.
Марий калык конгресс районлаште самырык-влак дене пашам виктара, а Йошкар-Олаште ешартыш вий семын И.Палантай лӱмеш колледжыште да национальный искусство гимназийыште тунемше да туныктышо-влак улыт, нунын дене пырля ышташ йӧным муаш темлем, манын К.Иванов.
Тенийлан палемдыме план почеш, моло паша деч посна кок книга савыкталтын. Иктыже «Язык памятников письменности марийского языка» маналтеш. Тудым филологий науко кандидат, Марий калык конгресс исполкомын еҥже О.Сергеев ямдылен. Книга шанчызын лӱмгечыже вашеш ош тӱням ужын. «Шучко сар огеш мондалт» лӱман книгам «Кугарня» газет редакцийыште ямдылыме, оксам конгресс гочат ойырымо.
Эше ик сай увер: лишыл жапыште Марий калык конгрессын Интернет лаштыкше пашам ышташ тӱҥалшаш. Тачысе кечын увер технологийым кумдан кучылтде огеш лий, сайтым чыла могырымат вияным ыштеда гын, чын лийыда, палемден министр.
Погынымаш мучашлалтмеке, О.Сергеев ден Марий калык конгресын вуйлатышыже Э.Иманаев тӱвыра, печать да калык-влакын пашашт шотышто министр К.Ивановлан книгам, «Кугарня» газет редакций деч курымашлык календарь-органайзерым кучыктеныт.
