Сылне марий кӱсле йук Санкт-Петербургышто да Ленинград областьыште йоҥгалтын 
«Сеҥымаш кӱсле» культурно-патриотический проектын гастрольжо мучашлалтын. Санкт-Петербургышто да Ленинград областьыште просветитель да музыкант Павел Тойдемарын марий кӱслеже йоҥгалтын.
Артист-влак Марий Элысе архивла гыч сар жапыште боец-влакын кумылыштым нӧлтышӧ ондак палыдыме муро-влакым йоҥгалтареныт. Интерактивный ончер гоч йӱдвел рӱдолаште илыше-влак историйын шагал тунемме лаштыклаже дене палыме лийыныт.
Ушештарыман: «Сеҥымаш кӱсле» проект Марий филармонийын фронтовой бригадыжын тале кӱслезыже Павел Тойдемарын вуйлатыме пашажлан пӧлеклалтын.
Марий Элысе Тӱвыра, печать да калык-влакын пашашт шотышто министерствын сайтше гыч налме фото.