Марий йылмына утларак вияҥже, яндарештше, возымыштына але ваш-ваш кутырмаштына тидын шотышто шагалрак экшык вашлиялтше манын, йылмызе учёный, журналист, поэт да писатель-влак коклан вашлийыт да леше тиде проблемым лончылат. Чынак, книгалаште, газет ден журналлаште савыкталт лекше материалласе чоҥымо предложенийлаште, мут сочетанийлаштат шоналтен шуктыде кучылталтме южо мутлан кӧра авторын мом каласаш шонымыжым умылаш неле лиеш, але воштылмашымат луктеш. Чын шонымаш, мутат уке, ӱчашымаште лектеш. Сандене газет редакцийлаште, книга издательствылаште, школлаштат йылмызе-влак чӱчкыдынрак погынен йылмын яндарлыкше нерген мутланышаш улыт. Кодшо арняште иктыгай вашлиймаш Йошкар-Олаште МарНИИ-н актовый залыштыже эртен.
