
13- 19 июльышто Йошкар-Олаште Калыкле сымыктыш гимназий пелен Марий йылме лагерь пашам ыштен. Тушко элнан икмыняр регионжо гыч 13 еҥ толын. Эн самырык тунемшылан 35 ий лийын, эн кугулан – 55 ий.
Лагерьын пашажым Ленинград областьысе «Ший корно» марий автономийым вуйлатыше Лариса Арламова виктара.
Лагерь марий йылмым тÿрлö кÿкшытыштö палыше да уло кумылын тунемаш шонышо еҥ-влакым чумырен. Нунын коклаште амалкалче, инженер, кугыжаныш пӧлкан пашаеҥже, шанчыеҥ, туныктышо лийыныт.
Занятийым эртарыме годым тӱрлӧ йӧным кучылтыныт: воктен шинчыше дене ваш мутланымаш, марий модыш-влак, почеламутым тунеммаш, шке нерген каласкалымаш, текстым лончылымаш. Ирина Тойгильдина Марий йылме лагерьыште занятийым кокымшо ий вӱда. Кокымшо туныктышо семын Наталья Венина пашам ыштен. Занятийын тӱҥ темыже-влак: «Палыме лийына», «Мый улам..», «Мыйын яра жапем», «Кочкыш», «Йомакым лончылымаш».
Тунемше-влак Йошкар-Оласе тоштерлаш, Калыкле книгагудыш, Марий книга издательствыш миен коштыныт. Тыгак Марий Турек районышто Ираида Степанован вуйлатымыже почеш «Традиции мари» экскурсийыш ушненыт. Сӱретче Иван Ямбердовын мастерскойыштыжо лийыныт.
– Ныл кечыште марий йылмым тунем шукташ огеш лий. Туге гынат ончыкыжым шинчымашыштым утларак келгемдаш, йылмым тунемаш кумылаҥденна, шонем. Ты лагерьым кажне ийын эртараш кумылна уло, – палдара Н.Венина.
Оксана Белкина, Мордовий Республик, Саранск ола:
– Мый филолог улам, мордова йылмым 9 ий шымлем, тыгак ты йылме дене онлайн-курсым вӱдем да Мордовий правительстве пелен гуманитарный шанче научно-шымлыше институтышто тыршем. Икмыняр ий ончыч Финляндийыште лийынам да финн йылмым тунемынам. Вара венгр курсышто шинчымашым погенам. Тений марий йылмым шымлаш кумылем лектын. Тунемме деч посна ме экскурсийыш коштынна, нунын гоч марий йӱла да тӱвыра дене келгынрак палыме лийынна.
Марий йылмым тунемаш нелынрак чучын, но лагерь деч вара книгам, видеоматериалым налынам да умбакыжат ты йылмым тунемнем, поснак грамматикылан тӱткышым ойырынем.