Лаштыкнан унаже – Марий Турек район Арбор вел ӱдыр Розалия Осинова. Кодшо ийын тудо МарГУ-со психолого-педагогический факультетышке дефектологлан тунемаш пурен. Ӱдыр мураш-кушташ мастар, спортым йӧрата, туризм дене ятыр ий заниматла. Тудо Марий Эл Республикысе йоча да самырык-влакын «Роза ветров» рӱдерышкышт ныл ий коштеш. Каныш годым ялысе «Арбор вел» ансамбльышке миен толеш.
«Арбор вел» ансамбльын куштызыжо
2019 ийыште шыжым Самырык театрыште республикысе «Ӱдырсий» конкурс эртаралтын ыле. Участнице-влак кокла гыч шуэн вашлиялтше лӱман, мураш-кушташ мастар ӱдыр вигак шинчашкем перныш. Сандене тудын нерген утларак пален налаш кумыл лекте. Розалиялан тыгай лӱмым ачаже пуэн. Тудо ача-аважын эн кугурак йочашт. Ешыште эше вич икшыве кушкын.
Розалия сылне Арбор кундем Шӱргынур (Памашъял) ялыште шочын-кушкын. 1-ше класс гычак Лоп ял клуб пеленысе «Арбор вел» ансамбльын участницыже лийын, коллектив дене пырля тӱрлӧ конкурслаште участвоватлен, пошкудо яллашке концерт дене кудалыштын.
Олимпиадылаште сеҥышыш лектын
1-ше гыч 9-ше класс марте кок меҥге тораште верланыше Лоп ялысе школышто тунемын. 9-ше класс деч вара пошкудо Татарстан Республикысе Ципья селашке тунемаш каен. Тиде школышто татар, одо, марий, руш ӱдыр-рвезе-влак шинчымашым налыныт.
Розалия марий йылме ден литературым, тыгак йот йылмым сайын тунемын. Сандене олимпиадылашке чӱчкыдын коштын.
«Лоп школышто марий йылмым Лариса Григорьевна Кондратьева туныктен. Тудо сай шинчымашым пуэн, марий йылмылан шӱмаҥден. 9-ше классыште марий йылме да литератур дене Марий Турек посёлкысо школышто эртаралтше районысо олимпиадыште 1-ше верым нальым. Вара республикысе олимпиадыште участвоватлышым. Тудо Йошкар-Олаште МарГУ-што лийын. Тушто 5-ше вер дене палемдалтынам. 10-11-ше класслаште Ципья школышто эртаралтше олимпиадыште 1-ше верым нальым. Вара – кок ий почела Татарстан Республикысе тазалыкым пеҥгыдемдыме «Костёр» йоча образовательный рӱдерыште лийше олимпиадыште», – ойла тудо.
Туризм пашам шукта
Нылытан да визытанлан гына тунемше ӱдыр спорт дечат кораҥын огыл. Тудо писын куржталыштын, многоборье дене заниматлен, футболла модын. Но спортын эн йӧратыме видше тудлан туризм кодын. Тачысе кече марте туризм дене заниматла.
«Тидлан Лоп школын физрукшо Любовь Николаевна Семенова кумылаҥден. Ӱдыр-рвезе-влакын молан мастар улмыштым эре эскерен шоген. Туризм кружокышто шке семын кочкаш шолташ, айдемым тӱрлӧ ситуацийыште утараш да тулеч молылан тунемат. Эн ончыч школын, вара районын сборныйышкышт логалынам. А ынде туризм дене республикысе сборныйышто улам.
Студент радамыш вончымеке, Республикысе йоча да самырык-влакын «Роза ветров» рӱдерышкышт кошташ тӱҥальым. Кодшо ийын ты рӱдер пелен «Школа безопасности» волонтёр-утарыше-влакын икымше отрядыштым ыштыме. Тушто ме соревнованийым эртарена», – ойла ӱдыр.
Медпашаеҥ профессийым ойырен
Марий йылме верч чон йӱлен илыше ӱдыр трукышто ончыкылык профессийым медицине дене кылдаш шонен. Тыге 2016 ийыште школ деч вара Йошкар-Оласе медколледжышке медсестралан тунемаш пура. Тушто эртаралтше тӱрлӧ мероприятийлаште йолташ ӱдыржӧ дене пырля марла мура. Колледжым колледжым йошкар диплом дене пытарен.
2019 ийыште МарГУ-н студентше лиеш. Дефектологлан тунемаш пурен гынат, чонжо туныктышо лияш ӱжеш. Студенткын ойлымыж почеш, ончыкылыклан Калыкле тӱвыра да тӱвыра кокласе кыл институтышко марий пӧлкашке тунемаш кусаралташ шона.