Йошкар-Олаште 18 гыч 21 июнь марте Республикысе юнкор слёт 4-8 класслаште тунемше ӱдыр ден рвезе-влакым уэш чумырен.
Нуно чыланат «Ямде лий» йоча газетын поро йолташыже улыт. Тӱҥ шотышто йоча-влак Марий Турек, Кужэҥер, У Торъял, Советский, Морко, Провой, Юлсер кундемла гыч улыт.
Торжественно почмашыш Марий Элысе тӱвыра, печать да калык-влакын пашашт шотышто министрым алмаштышыже М.И.Матвеев, Марий Элысе туныктыш да шанче министрын алмаштышыже В.Г.Гаврилова, марий поэт-влак А.Петров ден Т.Соловьёва, «Марий Эл» газетын тӱҥ редакторжо А.С.Абдулов ден «Марий Эл» савыктыш пӧртын директоржо Э.А.Иманаев миеныт. Лӱмлӧ еҥ-влак юнкор-влакым саламленыт, футболкым чиктеныт да йочаш годым «Ямде лий» газет дене кылым кучымышт нерген каласкаленыт, йоча-влак нунылан тӱрлӧ сынан йодышым пуэденыт.
Организатор-влак юнкор-шамычлан поян программым темленыт. Ныл кече жапыште йоча-влак ончычсо юнкор-влак дене Виктория Мамаева, Ирина Петрова, Виталий Мамаев дене вашлийыныт, чоным почын мутланеныт. Тыгак Игорь Попов, Зоя Дудина да Геннадий Сабанцев йоча-влакланым почеламутым возаш туныктеныт. Ӱдыр-рвезе-влак экскурсий дене Марий Эл радиош миеныт, Сеҥымаш паркыште «Цветик-Семицветик» кинон репетицийжым онченыт, куатле индустрий школыш пурен лектыныт. Тыгак тӱрлӧ марий модыш дене модыныт.
Юнкор-влак шке налме шинчымашыштым практикыштат терген онченыт. Чуваший Республикысе Новочебоксарск ола гыч «Грани» савыктыш пӧртын пашаеҥже А.В.Сергеев тунемше-влаклан мастер-классым эртарен: йоча-влак слёт гыч ик кечыже нерген кӱчык видео репортажым ыштеныт. Юнкор-влак заметкым возеныт, интервьюм налыныт, «Ямде лий» газетым ышташ полшеныт.
«Юнкор-влак весела кумылан, почылтшо чонан улыт. Слётыш нунылан у шинчымашым, у йолташым пуэн. Школышто умбакыжат юнкор пашам шуяш кумылан улыт», – ойла Христина Александрова.
Слётышто юнкор-влакын кажне кечыже пайдалын эртен. Икте-весе коклаште кылым кучаш тӱҥалыт да кажныже шкенжым сылнымут аланыште муэш манын, ӱшанена.
Дарья Быкова.
Елена Иванован фотожо-влак.