Марий йӱла айдеме ден пӱртӱс коклаште кылым пеҥгыдемдаш полша. Калыкнам ушан-шотаным ышта, чонышкына поро шӱлышым шыҥдара, чылажымат рат дене шукташ туныкта. Ме тиде поянлыкым ончыкылык тукымлан арален кодышаш улына. Лудшына-влак тидын шотышто мом шонат?
Галина Бояринова, У Торъял район:
– Ешна марий йӱлам шуктен шогышо, сандене изинекак тиде кышкарыште шуаралтынам. Шорыкйол пайремлан ешге ямдылалтме, тӱрлӧ кочкышым ыштыме. Тыгак ковам посна пӧлекым: пӱкшым, ломбыгичкым, ӱячам кучыктен. Ӱярнялан мелнам кочмо, тиддеч ончыч Юмылан пелештыме, мунчалташ коштмо.
Кугече – поснак вучымо пайрем. Шарнем, ачам лӱмынак лӱҥгалтышым ышта ыле. Муным чиялтенна, когыльым кӱэштынна, у вургемым чиенна. Пайрем деч ончыч пӧртым эрыктенна, сӧрастаренна. Авам юмылукым чиялтыме кагаз пеледыш дене сылнештарен.
Кеҥеж пайрем кокла гыч Семыкым палемдыман. Ты кече марте ковам пеледышым кӱрлаш чарен. Мончаш эрденак пурымо, шудо вӱд дене чывылалтме. Вес тӱняш кайыше лишыл-влаклан посна сортам чӱктымӧ.
Мемнан велне Спас пайремлан Кемсола ден Токтарсола ял-влакын посна шӱгарлашкыже ушташ коштыт. Тиде йӱлам кызытат шуктен шогена. Тудынат шке кышкарже, пелештыме шомакше уло. Чыла тидым изинек чоныш пыштыме, ушыш шыҥдарыме, сандене тачат тидым шуктена.
Палена, яра вереш нимо ок шоч. Калыкна илышыжым мланде паша радам дене келыштарен, илыш сай лийже манын тыршен.
Кристина Быкова, Кужэҥер район:
– Марий йӱла нерген каласкалаш гын, эн ончыч еш кумалтышым палемден кодынем. Ме Кужэҥер район Лопсолаште илена. Кумалтышым ме шыжым эртарена. Ты кече деч ончыч мончаш пурена, яндар вургемым чиена. Кумалтыш кечын эрдене ковам неран киндым да мелнам кӱэштеш. Авамын пелештымекыже, комбым пуртен пелештат, сомылым шуктат, вара – лудым. Мучашлан лем ден мелнам авызлена.
Тыгак Кугечым, Сорта чӱктышым, Семыкым пайремлена. Семык ден Сорта чӱктыш годым тоштыеҥым уштена.
Кугече годым ковам тичмаш кинде-сукыр дене эр кечым вашлиеш.
Мыйын шонымаште, марий йӱлам жаплаш кӱлеш. Тудо мемнам поро лияш туныкта.
