6 сентябрьыште Марий Элым вуйлатыше А.Евстифеев республикысе онаеҥ-влак дене вашлийын.
Тыгай вашлиймаш ондакат лийын, тылеч вара вуйлатыше Марий Элысе юмыйӱла ушем-влак дене кылдалтше икмыняр пашам ышташ кӱштен. Тидын нерген ойлымо деч ончыч А.Евстифеев чолга онаеҥ-влаклан – У Торъял районысо «Марий кумалтыш» общиным вуйлатыше В.Богачёвлан, Кужэҥер районысо «Ошмарий-чимарий» общиным вуйлатыше А.Рукавишниковлан (фотошто) да Советский посёлкысо «Марий кумалтыш» общиным вуй-
латыше Г.Милютинлан – Марий Эл вуйлатышын тауштымашыжым кучыктен.
Ты вашлиймаш деч вара А.Евстифеев республикысе образований да науко министерствылан «Марий калык йӱла» предметым, «Основы религиозных культур и свет-
ской этики» дисциплиныш марий юмыйӱла нерген модульым пуртымо нерген йодышым ончен лекташ кӱштен.
Тылеч посна марий калыкын юмыйӱлаж нерген тоштерлаште экспозиций-влакым ешарыман, монографий-влакым савыктыман, Марий Элысе Рӱдӧ юмыйӱла ушемлан пӧлемым ойырыман. Тыгак Марий Турек районышто музейно-этнографический комплексым келыштараш, Волжский район Чодыраял воктенысе отылан паспортизацийым ышташ кӱштымӧ. А марий юмыйӱла дене кылдалтше верлам паломник ден турист-влакын маршрутышкышт пуртышаш улыт.
Эльвира ТЕРЕНТЬЕВА.