Кугун да йоҥгыдын каласыме. Тыге ме Марий Элын сулло артисткыже, пагалыме радио-журналист Раисия Михайловна Данилова нерген ойлена. Тудын ӱмыржӧ идалык ончыч, 2021 ий 22 июльышто, автоавариеш кӱрылтӧ. Илымыж годымат ме икте-весылан пеҥгыде эҥертыш лийынна, кертмына семын полшенна, неле туткар пагытымат пырля эртенна. Да тыге – пытартыш кечылаж марте.
2021 ийыштак шушаш лӱмгечыж вашеш (але икмыняр ий уло гынат) вес книгам ямдылыме нерген каҥашенна.
Тудо тыгак «ВийАр» тӱвыра кыл ушемым вуйлатыше Алена Иванова деке тыгай темлымаш дене лектын:
«Мыйын пеш шуко записем уло. Кӧ дене гына вашлийын, интервьюм налын, передачым ыштен пытарен омыл гын. Алена, чыла тидым оцифроватлен, ик сайтым ышташ полшет гын, пеш сай лиеш ыле. Тыйын проект дене ыштыме опытет кугу. Тек калыклан шарнымашеш кодеш…»
Но пӱралтын огыл улмаш тудлан книгамат ужын шукташ, сайтым ыштыме, чыла тиде поянлыкым интернетыш вераҥдыме йодышат ыш шукталт. Туге гынат книга ямдылыме сомыл эркын кая. Такше ме ик тыгай книгам 2012 ийыштак луктынна ыле. «Муро – илыш йыжыҥем» маналтеш.
…
Лайд ШЕМЙЭР.