Марий илыш – Интернетыште

Илыш моткоч писын ончыко кая. Чыла вашталтеш, уэм толеш. Кызыт чылажат Интернет дене варналтмыла чучеш. Тудын деч посна самырык еҥ веле огыл, кугыеҥжат ынде илен огеш керт, очыни. Кевыт, кафе, книгагудо, кинотеатр – чыла телефоныш шыҥен. Информационный пространстват вараш огеш код, илыш дене тӧр кая.

МЭТР телекомпаний

мэтр тв

ГТРК дене таҥастарымаште Марий Эл телерадиокомпаний самырык. Туге гынат еҥвлакым сымыстараш тырша. Налаш, мутлан, марий программе-влакым. Кызыт нуно шукемыныт. «Тыланем мый тыланет…» у программе кажне паша кечын 6 шагатат 30 минутышто да 15 шагатат 30 минутышто тӱҥалеш. Viber ден WhatsApp мессенджерлашке пурышо саламлымаш-влакым йоҥгалтарат. Пайрем оза-влак лӱмеш муро-влакым колтат.

Тыгак Марий Эл радион студийже гыч икмыняр вияш эфирым кажне паша кечын МЭТР каналыште 16 шагат гыч 17 шагат марте ончаш лиеш. Мутлан, «Шкетан театрыште – антракт», «Вийвалне», «Марий самырык театр», «Полмезын йӱкшӧ», «Марий погын вашеш». Руш программылаштат ятыр вашталтыш уло. Тыге 7 гыч 9 шагат марте «Утро на МЭТР-е» программе кая. Тылеч посна чыла программе ден передаче-влак Интернетыште улыт.

Тений кеҥежым Марий Эл радиолан 15 ий теммым палемдышт. Пайрем кечын, 1-ше июльышто, радио эфир кава йымалне, яндар южышто лийын. Чыла тидым You Tube площадкыште ончаш йӧн ышталтын. Ты кечын кажне кумылан еҥ лишемын, вияш эфирыш лектын кертын.

Ынде пел ий утла эфир гыч трансляцийым тӱнян кеч-могай кундемже гыч кеч-могай жапыште ончаш йӧн уло. 24 шагат жапыште эфирым шеҥгек колтен ончаш лиеш. Ӱшанена, тиде эше чыла огыл. Ончыкыжымат мемнам у йӧн дене куандарышт!

ГТРК телевидений ден радио

гтрк марий эл

Тений ГТРК-лан 60 ий теме. Тудат илыш дене тӧр каяш тырша. «Увер аршаш», «Шӱмсем пӧлек», «Пошкудем» передаче-влакым Интернет йӧн дене You Tube каналыште ончаш лиеш. Радио программым колын шуктен огыдал гын, Интернетыште уло. Чылажат кызытсе илыш йодмо семын.

«Марий ТВ»  YouTube-канал

 

Ты канал You Tube площадкыште шукерте огыл лектын гынат, шуко оҥай видеоматериалым муаш лиеш. Мутлан, концертла гыч номер-влак, Марий КВН гыч ужаш, фестиваль-влак гыч номер, кӱчык мыскара-влак да тулеч молат. Чылажат марий йылмым вияҥдаш, пойдараш манын ышталтеш.

Марий йылме корпус

Тудым ыштымаште МарНИИ-н шанче пашаеҥже, Марий тӱвыра рӱдерын методистше Андрей Чемышев, Марий тӱвыра рӱдерын йылмым да тӱвырам инноваций могырым вияҥдыме пӧлкам вуйлатыше Геннадий Сабанцев да методист-влак Надежда Тимофеева ден Михаил Кудрявцев кыртмен пашам ыштат.

Mari-Lab.ru сайтыште нунын лектышыштым ужаш лиеш. Икмынярже дене палдарена: марий клавиатурын телефонлан да компьютерлан раскладке, электрон книгагудо, электрон мутер да тыгак электрон курс. Электрон курс 30 урокым авалта. Тушто тыглай марий мут-влакым возен гына кайыме огыл. Нине мут-влакын йоҥгалтмыштым колаш лиеш, а урок мучашыште изирак тест-влак пуалтыт. Тунемше пален налме материал почеш шкенжым терген кертеш.

«Кугарня», «Марий Эл», «Ямде лий» газет-влак

Ондак газет материалым кагазыште веле лудын кертынна гын, кызыт сайтлаште увер-влакым але статьялам вигак лудаш лиеш. Кушто могай событий лиймым вигак фото дене Интернет тӱняш луктыт, сандене шукын кушто мо ышталтмым вашке пален налыт. Газет-влакат тиде йӧным пашаштышт кучылтыт. Тыге кызытсе курым йодеш. Кажне редакцийын чыла гаяк соцкылыште лаштыкше-влак улыт. Тушто тӱрлӧ увер, фото, пайдале каҥаш-влакым муаш лиеш. Тыгак «Кугарня» газетын You Tube площадкыште каналже уло. Тушто «Воштылаш, товатат, сулык огыл…» мыскара-концерт гыч ужаш-влакым, моло видеом ончаш темлат.

«Марий-влак умылат»

Инстаграм сетьыште тиде лаштыкым шукын колыныт да ужыныт, очыни. Тушко марий вургеман ӱдыр-рвезе-влакым луктыт. Могай гына кундемла гыч фотом огыт колто: Свердловск ден Киров областьла, Санкт-Петербург, Моско, Озаҥ олала да тыгак Марий кундемын тӱрлӧ районлаже гыч. Самырык-влак, марий вургемым муын, тӱрлӧ фотосессийым эртарат. Тидыже моткоч куандара. Тыге ме вес кундемлаште илыше марий еҥын вургемжым, сын-кунжым ужына, тыгак марий калыкым йӧраташ, марий йӱлам шукташ шӱмаҥдена.

Тыштак тӱрлӧ конкурс-влакым эртарат, а сеҥыше-влаклан марий орнаментан кулоным, кружкам я вес ӱзгарым пӧлеклат.

Марий калык шкенжым Интернет кылыштат чолган ончыкта. Тидыже моткоч куандара. Самырык ӱдыр-рвезе-влак утларак марла возат, марий вургеман фото-влакым луктыт, марий мурым колыштыт. Тугеже чыла тиде паша арам огыл ышталтеш, изи гынат, лектыш уло. Кушкын толшо ӱдыр-рвезе-влак садак марий йӱлалан, йылмылан, мурылан шӱмаҥыт. Иктым шотыш налман: нунылан келшыше формат дене шочмо йылмым да калыкым йӧраташ туныктыман.