1990-ше ийлаште мурызо Людмила Иванова поснак ойыртемалтын. Тудын яндар йӱкшӧ шуко еҥын чонжым савырен, ныжыл, сылне мурыжо-влак илыш вийым пуэныт. 1990-ше куштылго огыл жап тудынат илышыштыже поснак лакемалт кодын. Туге гынат тыршен пашам ыштымыж дене лектышыш шуын. Тудо Марий филармонийыште 35 ий тыршен, тыгодымак марий эстрадыште шке мастарлыкшым ончыктен. Кызыт – сулен налме канышыште.
– 1990-ше ийлаште мый ешан, кок шочшан ава лийынам. Тунам неле ыле. Пашадарым тӱлен огытыл, олмешыже киндым, шӧр сатум пуэденыт. Тыгак илен лектынна. А филармонийыште планым эре шукташ кӱлын. Капеллын уло составше дене лектын кошташ кугу транспорт кӱлын. Сандене изи составым чумырымо ыле.
Эн ончыч «Индеш шагатлан», «Вуча арама» ретро муро-влакым муренам, варажым мыланем муро-влакым возеныт. Яллашке лектын, йӱштӧ клублаште выступатленна. Пошкырт, Свердловск кундемлашке гастроль дене коштынна. Мыйын тӱҥ пашам верем капеллыште лийын. Искандаров лӱмеш хоровой капеллыште шагал огыл сольный партийым муренам.
Варажым тӱҥ состав дене ӧрдыж верлаш лектын кошташ тӱҥалынна. Санкт-Петербург оласе «Поющий мир» конкурсышто кок гана шкенам тергенна да ончыл верла дене пӧртылынна. У эстраде муро дене мый «У муро» фестивальыште мастарлыкем ончыктенам.
Кызыт сценыш шуэн лектам. Шукерте огыл мурызо Валерий Тихоновым шарныме лӱмеш концертыште выступатлышым. Ынде кумшо ий пенсийыште улам. Ужалыме аланыште тыршен онченам.
Шошо гыч шыже марте пакчаште шогылтам. Пеледышым моткоч йӧратем. Лум шулен пытымеке, кӱдыроҥгыр-влак сылнын пеледалтыт, варажым вес пеледыш-влак куандарат. Яра жапем годым ешемлан тӱрлӧ когыльым, шере кочкышым ыштем. Телым уныкам-влаклан чияшышт тӱрлӧ вургемым пидам. Вет нуно мыйын илышыштем ик тӱҥ верым налыт, – ойла Л.Иванова.