16 апрельыште Йошкар-Олашке Российысе триатлон федерацийын президентше К.С.Шойгу толын каен. Тудым Марий Эл Правительстве Председательын алмаштышыже – тӱвыра, печать да калык-влакын пашашт шотышто министр К.А.Иванов вашлийын.
Тунемме программыш пуртат
К.Шойгун Марий Элыш толмо ик амалже – кундемыштына триатлон спортым вияҥдаш, тидлан икшыве-шамычым изинек кумылаҥдаш. Тудо республикысе школ-влакын туныктымо программышкышт триатлон дисциплиным пуртымо шотышто шонымашыж нерген Марий Элым Вуйлатыше Юрий Зайцев дене вашлийме годым ойлен.
Юрий Викторовичын палемдымыж почеш, шонымаш сай, вет кундемыштына триатлоным йӧратыше-шамыч коклаште профессионал-влак шукемыт. Тидланже тренироватлалташ чыла йӧным ыштыме, республикыштына спортын ты видше дене Россий кӱкшытан таҥасымаш-влакым эртарымат шӱкалтышым ышта. Пример шотеш кундемнан вӱдышӧ спортсменже Мария Шерстнёвам триатлон дене Российын тӱҥ сборный командын ик эн тале еҥже манын палемден.
Юрий Викторович ден Ксения Сергеевна туныктымо программыш триатлон спортым кузе пурташ лийме шотышто каҥашеныт. Ончыч Йошкар-Оласе Бауман лицейыште физкультур урок годым триатлонын модульжым туныкташ палемдыме. Ты лицей Российыште триатлоным школ программышке пуртымо шотышто – кокымшо. Кундемнасе моло тунемме тӧнежыштат ты дисциплиным эркын-эркын туныкташ тӱҥалыт.
Бауман лицейыште
Ксения Шойгу Бауман лицейыште уна лийын да тушто триатлон дене тренировкым эртарыме базым, тыгак бассейным, спортзалым, тазалыкым пеҥгыдемдаш полшышо рӱдерым, кванториумым, ушан площадкым ончалын.
Лицейын тӱрлӧ аланыште вияҥ толмыжо да коллективын пашаж нерген директор Григорий Ефимович Пейсахович палдарен. Тудын ойлымыж почеш, лицейыште тунемше-влакын уш-акылыштым вияҥдаш да капкылым шуараш кугу тӱткыш ойыралтеш. Садлан нунын кочкыш рационышкышт пайдале кочкышым пуртымо, капкылысе уто нагрузкым кораҥдаш полшышо аппарат-влакым медицине рӱдерыште вераҥдыме. Тыште науко, тӱвыра, спорт направлений-влакым вияҥдаш тыршат. Мутлан, физкультур урок жапыште тунемше-шамычлан спортын тӱрлӧ видыштыже шуаралташ йӧным ыштыме.
Йошкар-Оласе Бауман лицейын туныктымо программышкыже триатлон дисциплинын модульжым 2024 ий 1 сентябрь гыч пурташ палемдыме. Кызыт физкультурым туныктышо-влакын квалификацийыштым нӧлташ курс-влакым ямдылыме шотышто пашам шуктыман. Тыгак триатлон дене тренерлан школышто ешартыш паша верым ямдылыман.
«Олимп» спорт полатыште
Ксения Шойгу Йошкар-Оласе «Олимп» спорт полатыште кундемыштына триатлон спортым ончыко вӱдышӧ еҥ-шамыч дене вашлийын, ты спорт пӧлкан тренировкым эртарыме залжым ончалын, йоча-шамычын тренировкыштым эскерен. Тудо тыгерак каласен:
– Ятыр йоча триатлон дене заниматла. Лицейыштат, спорт полатыштат тидым шекланышым. Мутат уке, тиде мыйым моткоч куандара. Вет спортышто иктаж лектышыш шуаш шонет гын, изинек чот тыршыман. Весат кумылым нӧлта – Марий Элыште триатлоным вияҥдымылан кугу тӱткыш ойыралтеш. Тачысе кечылан тидын шотышто шуко пашам шуктымо. Спортын ты видше дене мероприятий-влакат эртаралтыт. Ӱмаште, мутлан, тыште Россий кӱкшытан ик таҥасымаш лийын гын, тений кумытым палемдыме. Тендан землякда-влак триатлон дене Российысе тӱҥ сборный командын еҥже улыт. Тидыже самырык тукымым да йоча-шамычым спортышто кугу кӱкшытыш шуаш эшеат кумылаҥдышаш, шонем. Йоча-влак коклаште триатлоным вияҥдаш элнан триатлон дене федерацийже тӱрлӧ грант дене полшаш тӱҥалеш.
Ксения Сергеевна Шойгу Марий кундемыш паша дене толын гынат, Йошкар-Олан мотор верлажымат ончал савырнен. Набережный, оҥай объект-влак, сӧрал пӱртӱс тудым сымыстареныт. Кундемыштына триатлоным вияҥдымылан кугу пашам шукташ, мероприятийым эртараш тӱҥалыт гын, тугеже тудым тыште эше шуко гана ужына.
Ксения Шойгу – Россий обороно министр Сергей Шойгун ӱдыржӧ.
2013 ийыште Москосо тӱнямбал кыл кугыжаныш институтын (МГИМО) тӱнямбал экономике кыл факультетшым тунем лектын. Англичан да китай йылмылам сайын пала.
Тудо триатлон дене стартыште кок гана участвоватлен: 2019 ийыште – У Зеландийыште, 2020 ийыште – Сочиште. Тыгак полумарафон ден марафон-влакын участникше.
Ксения Сергеевна Российыште OCR-движенийлан (тӱрлӧ чаракым эртымаш) тӱҥалтышым пыштыше семын шотлалтеш. 2013 ийыште палымыже-шамыч дене пырля элыштына «Гонка героев» тӱрлӧ чаракым эртыман куржталмашым эртареныт. Варажым таҥасымаш тӱнямбал кӱкшытаныш савырнен. Ты мероприятийлан кӧра ик шонымашан еҥ-шамычым ушышо «Лиги Героев» команде шочын. Тудым Ксения Сергеевна вуйлата. Нуно Российыште любительский да профессиональный спортым вияҥдаш да ончыко вӱдаш полшат. Тыге элыштына икымше гана синхронный стартан «ЗаБег» полумарафон да моло мероприятий эртаралтыт. 2020 ийыште К.Шойгун вуйлатыме «ЗаБег» полумарафонжо ятыр олалам авалтыме дене Гиннессын рекордшо-влак книгаш логалын. Ты ийынак тудым Российысе триатлон федерацийын президентшылан сайленыт. Ксениян кум ияш Милана ӱдыржӧ уло. Марлан каен огыл.
Марий Эл Правительствын пресс-службыжын фотожо-влак.