Кодшо ийын кеҥежым республикыштына «Иле, мыйын ялем!» фестиваль лийын гын, тений «Марий Элыште каникул» фестиваль эртаралтеш. Кажне тӱвыра пӧрт яллашке лекшаш да йоча-влак дене могай-гынат мероприятийым эртарышаш.
Кораксола тӱвыра пӧртна пошкудо Шӱргыялышке миен. Тушко «Кече» сводный отрядышке коштшо икшыве-влак да Шӱргыялысе ныл йоча ушненыт.
Ондак Шӱргыялым ончен савырненна. Валентин купым ончыктышым, Пӧтыр курыкыш намийышым, изак-шоляк Янсит ден Яким нерген каласкалышым. Янситше яллан тӱҥалтышым пыштен, Якимын суртшо корем серыште лийын да Яким корем шочын, а Пӧтыр изашт лӱмеш пеш кугу Пӧтыр курык кок уремым ойыра. Йоча-влаклан Шӱргыял памаш келшен.
Вара нуно район кӱкшытан «Шочмо мландем да ешем – мыйын тӱҥ поянлыкем» квизыште таҥасеныт. Н.Сергеева Морко вел нерген почеламутым йоҥгалтарен. Кораксола книгагудо вуйлатыше Т.А.Кириллова шочмо мланде да еш темылан тушто ден калыкмут таҥасымашым темлен. Кораксола тӱвыра пӧртын художественный вуйлатышыже В.Г.Кириллова «Шочмо мланде» да «Еш» команде-влак коклаште тӱрлӧ таҥасымашым эртарен. Пытартышлан чыла икшывылан шере пӧлекым кучыктенна.
Елена Григорьева, Кораксола тӱвыра пӧрт вуйлатыше.
Морко район
