Тений «Современная школа» регионысо проект почеш Йошкар-Оласе Бауманский лицейыште «Кванториум» школысо технопарк почылтеш.
Марий Элыште тыгай йоча технопарк икымше гана ышталтеш. Тудо кӱкшӧ технологический оборудований-влак дене пойдаралтеш. Тидыже тунемше-влакым инженер профессий дене лишкырак ышташ полша.
«Кванториум» технопаркым ышташ 21,4 млн теҥгем ойырымо. Тушеч 20,9 млн теҥгем федеральный, 0,4 млн теҥгем республикысе бюджетла гыч колтымо.
Тачысе кечылан тушко ноутбук, МФУ, 3D принтер, микроскоп, «Умная теплица» набор-влакым, гидропонный установкым колташ тӱҥалыныт. Лицей интерактивный панель, биологий, физиологий, химий, физике дене лабораторий, фрезерный станок, паяльный станций, роботехнике набор, антибактериальный бокс-влак да моло дене пойдаралтеш.
Кызыт куд кабинетыште ачалыме паша кая. Тушто роботехнике, хай-тек, биотехнологий шӧрын дене лабораторий-влак лийыт. Ешартышлан айти-квантумым почаш шонат. Тиддеч посна йоча-влак икте-весе дене мутланен, пашам ыштен, пырля ум да оҥайым шонен луктын кертышт манын, посна верым ойырат.
«Кванториумышто» физике, химий, биологий дене эртыше занятийлашке ты лицейын тунемшыже-влак веле огыл, тыгак республикысе моло школла гычат коштын кертыт. Тунемше-влаклан ешартыш шинчымашым налме программым темлат.
Тушто квалификацийым нӧлтымӧ курс-влакым эртыше ешартыш шинчымашым пуышо педагог ден школысо туныктышо-влак туныкташ тӱҥалыт.