Пандемийлан кӧра эмлыме учрежденийла шке пашаштышт у йӧным кучылташ тӱҥалыныт. Мутлан, ӱдырамаш консультацийым телефон дене эртарымаш.
Кызыт Марий Эл Республикын тазалыкым аралыме министерствыжын полшымыж дене ача-ава лияш шонышылан икымше онлайн-школ почылтын.
Республикысе медицине пашаеҥ-влак Йошкар-Оласе IT-специалист дене кылым чак кучен, кызыт тунемме медицине увер (информационно-медицинский) модульым шонен луктыныт. Тиде модуль 21 занятийым авалта да йочам ышташ ямдылалтме тат да азан шочмыж марте келге шинчымашым пуа.
Каласыман, онлайн-школым тунем пытарымеке, нимогай аттестатым огыт кучыкто. Туге гынат, тунемаш толшо ончыкылык ача-ава-влак кыртмен тунемшаш улыт. Налме шинчымаш нунылан таза йочам шочыкташ полша.