22-24 февральыште «Марий Эл» Ий полатыште изирак ийготан фигурист-влак коклаште «Мемориал – С.А.Жука» фигурный мунчалтымаш дене Российысе таҥасымаш лийын. Спортсмен-влак шкет мунчалтымаште лӱмын ямдылыме программе почеш выступатленыт.
Станислав Алексеевич Жук ты таҥасымашын форматшым шке ямдылен. Садлан тудлан тудын лӱмжым пуаш палемденыт. Изирак да кыдалаш группылаште шуаралтше фигурист-влак кум тӱрлӧ программе почеш элемент-шамычым ончыктеныт. Эн ончыч посна элемент-влак дене палдареныт, вара кӱчык да произвольный программылаште мунчалтеныт.
Элнан тӱрлӧ регионжо гыч ушнышо изи спортсмен-влак ончыкыжым элнан чапшым тӱнямбал кӱкшытыштӧ аралаш тӱҥалыт манын ӱшанена. Марий Элысе ийыште мунчалтымышт нунын спорт карьерыштышт кугу кышам кода манын шонена.