2-6 декабрьыште Ставрополь олаште уш-акылым, усталыкым, спортлан кумылан улмым тергыме «Молодые лица страны – Мисс и Мистер Студенчества России-2022» конкурс эртаралтын. Тушко Марий Эл ынде индешымше ий ушна. Тений кундемнан чапшым МарГУ-со историко-филологический факультетыште кокымшо ий тунемше Галина Коршунова арален.
Шуко опытым налын
Конкурсышто элнан 31 регионжо гыч 56 ӱдыр-рвезе Мисс да Мистер лӱмым налшаш верч таҥасен.
– Конкурсышто кундемна гыч Волгатехыште тунемше Матвей Царегородцев дене лийынна. Тудо мистер семын шкенжын мастарлыкшым терген. Тӱрлӧ конкурсым эртенна. Шочмо вер дене кылдалтше эссем возенна, Марий Элна, вузна нерген ончылгоч ямдылыме визитке дене палымым ыштенна, шке нерген каласкаленна, усталык номерым ончыктенна, гала-концертыш кас дефилем аклаш луктынна. Тений ме тӱҥ титулым, икымше верым, налын кертын огынал гынат, опытым погенна да Россий таҥасымашыште финалыш лектынна. Сандене моткоч пиалан, куаныше улына. Элыштына илыше тӱрлӧ калык дене палыме лийынна, конкурс деч варат ме икте-весе дене мутланена. Сай, поро шарнымаш гына кодын. Тидыже йӱштӧ телымат кумылнам нӧлта. Мыланем короным, тасмам да дипломым кучыктеныт, – мане Г.Коршунова.
Изиж годсек уста
Галина – Йошкар-Олаште шочын-кушшо ӱдыр. Йошкар-Оласе Т.И.Александрова лӱмеш 11-ше №-ан лицейыште тунемын. Усталыкшым йочаж годсек вияҥден толын, тыгодым сайын тунемын. Почеламутым сылнын лудын моштен, тӱрлӧ конкурсыш чолган ушнен. Музыкальный школышто скрипке дене шокташ тунемын, театральный студийыште мастарлыкшым вияҥден да сылнын куштен. Кызыт тудо Медведево посёлкысо «Маска» калык театрыште устан модеш.
– Изиэм годсек тӱрлӧ могырым шкем вияҥдаш тыршенам, тидыже ончыкылан кӱлеш лийын. Сценым моткоч йӧратем. Тушто эн пиалан улмем шижам. Ме ончышылан тӱрлӧ еҥын илышыжым, кӱлешан ойым намиен шуктена. Тидыжак мом шога! Спектакльыште эн изи рольжат тӱҥыш савырнен кертеш. Тидлан уло чоным пыштен гына модман, – ойла Галина.
Галина вузышто руш йылмым да литературым туныктышылан шинчымашым налеш. Ты профессий тудлан эре лишыл лийын. Вет кугезе коваже, коваже, аваже – чыланат туныктышо улыт. Сандене ӱдыр нунын корныштым тошкаш шона. Тунеммылан шуко жапым ойыра, шушаш сессийлан чот ямдылалтеш. Тыгак тудо ик фитнес рӱдерыште администраторлан ышта.
Ӱдырлан ончыкыжымат тыгаяк чолга, тале лияш да кугу сеҥымашыш шуаш тыланена.