Марий Элын лӱмгечыжлан пӧлеклалтше пайрем Э.Сапаев лӱмеш опер да балет академический театрыште эртаралтын.
Тушто Марий Элым Вуйлатыше Ю.Зайцев погынышо-влакым эн ончыч саламлен да республикнан тӱрлӧ областьыште шумо сеҥымашыж нерген каласкален. Федераций Советыште Марий Эл Республикын кечыжым эртарымашат ончыко шӱкалын. Тушто каҥашыме чыла гаяк мероприятийым илышыш шыҥдараш палемдыме, тидыже экономикынам, социальный сферым саемдаш ончыкыжымат полшышаш. Тыгодым республикнан социально-экономический вияҥдымаш программым 2030 ий марте шуйымо нергенат ушештарен. Ик эн кӱлешан направлений семын СВО-што улшо салтак-влакын ешыштлан полшымо пашам палемден – республикыште 40 утла социальный полыш уло манын.
А варажым Ю.Зайцев кундемым тӱзатымашке кугу надырым пыштыше-влаклан кугыжаныш наградым кучыктен. Тыгак – Росгвардийын военнослужащийже-шамычлан – I степенян «За заслуги перед Отечеством» орденын медальжым, «За отвагу» да Жуковын медальже-влакым.