15 апрельыште «Защитники Отечества» фондын попечительский советшын заседанийже Юл кундем федеральный округын административный рӱдерыштыже эртаралтын.
Тушто ты округысо кундем-влакын СВО участник-влаклан тӱрлӧ могырым полшымо пашам пример шотеш конденыт.
Фондым вуйлатыше А.Цивилева попечительский советын пашаж нерген ойлымо годым ветеран ден инвалид-влаклан спецвургемым илышыш шыҥдараш кӱлмӧ нергенат каласен. Тидлан фонд адаптивный вургемын дизайнже шотышто «На крыльях» тӱнямбал конкурсым увертарен.
Заседанийыште «Защитники Отечества» фондын Марий Элысе филиалжым вуйлатыше, Патырлык орденын кавалерже Ренат Магсумов демобилизоватлыме участник-влаклан полшымо системе дене палдарен. Тудын мутшо почеш, социализацийыште тӱҥ рольым спорт налеш, поснак регионышто следж-хоккей вияҥме нерген ойлен.
– Тений мартыште республикышкына фондын проектше почеш шым комплект толын. Шукерте огыл икымше таҥасымаш эртаралтын. Ме кызыт медаль верч огыл тыршена, а опытым погена. Тӱҥжӧ – еҥ-влакын пиалан чурийышт. Сай пример – ампутант Дмитрий Белов. Кунам мемнан деке икымше гана толын, туддеч ме негативым гына колынна. А кызыт тудо йӧршеш вестӱрлӧ, Диман вий-куатше следж-хоккейыште сайын палдырна, – каласен Р.Магсумов.
Попечительский советын регионлаште эртарыме заседанийже фондын у форматшылан шотлалтеш да филиал-влакын пашаштым саемдаш утыр полшышаш.