Марий автономийын шочмо кечыже вашеш да Марий калык конгресслан 20 ий темме лӱмеш 30 октябрьыште Волжск оласе ече базыште куштылго атлетике дене кросс-гандикап эртен.
Стартыш профессионал-спортсмен-шамыч дене пырля куржталаш кумылан, таза илыш-йÿлам кучышо-влак лектыныт. Таҥасымашке пошкудо Татарстан гыч, Чебоксар, эсогыл Москва областьысе Зеленоград ола гыч толыныт. Чылаже витле наре еҥ ушнен.
Моторын, воштончыш гай (ночко игечыште чылт тыгак койын) тӧр шарен кайыме асфальт корно тасма гай шуйнен, а чодыра кӧргыштӧ пушкыдо мландывач куржын эртыме. Куштыжо серпантин гай савыртыш вашлиялтын, курыкыш кӱзен-волаш логалын, трассым нелемдаш манын, асфальт корнышто кӱкшакамат, кӱварымат ыштыме. Верын-верын йол йымалне вӱд чопыж-ж шоктен кодеш…
Изирак ийготан да тунемше-влак 1 километрым куржын эртеныт гын, молышт – 10 километр кутышым. Кумылан-влаклан 2,16 километрыш VIP-таҥасымаш лийын.
Ты кечын йӱр ончыч шыман гына выжгыктыш, а старт пуалтмек, утыр талышныш ‒ пуйто таҥасыше-влакым игечат тергаш тарванен. Чодыра коклаште пӱртӱсын чевер тÿсшат вигак шинчалан перныш: ужар сывынан пÿнчö ден кож коклаште лышташан пушеҥге-влак шыже чиемышт дене сымыстареныт. Чылт романтике шӱлыш!
16 ияш марте тӱшкаште 1-3-шо верым Селиван Дашков, Савелий Камдин, Максим Черняев налыныт, ӱдыр-влак коклаште Кира Зайкова, Ксения Романова, Анжела Смекалова ойыртемалтыныт.
Асфальтан, чодырасе лавыран эн кужу кутышым куржын эртеныт да сеҥеныт: Вячеслав Афанасьев, Вячеслав Мартьянов, Валерий Цветнов, ӱдырамаш коклаште Елена Данилова, Натали Жаркова, Евгения Зиновьева.
Сеҥыше ден призёр-шамычлан медальым, шарнымашан пӧлекым кучыктеныт гын, чыла участниклан Марий калык конгресс деч изи сувенир-брелокым пуэныт. Кажне категорийыште икымше верым налшылан «Кугарня» газет редакцийын фирменный пырдыж шагатшым кучыктымо. Чыла участникым шокшо кочкыш дене сийлыме, муро дене кумылым нӧлталаш «Кас сем» ансамбль (Геннадий Григорьев, Геннадий Куклин, Майя Ахмедянова), гармонь дене Олег Бакутов полшеныт.
– Марий кундемыш вес амал дене толынам, но таҥасымаш лиймым пален налмек, йÿрым ончыде тышке вашкышым. Пеш келшыш. Ече-роллер трассе моткоч чапле. Тыгайыште йолжат пуйто шкеак куржеш. Теве верысе пайрем нергенат изиш пален нальым, – палдарыш Зеленоград гыч уна, сеҥышыш лекше Елена Данилова.
– Ийгот погына гынат, чон эре самырык. Тиде трассе пеш келшыш, ласка ыле, а йÿр мыланна нимогай чаракым ыштен огыл. Адакшым тыгай спорт мероприятий – йолташ-влакым ужаш, икте-весе дене кутыралташ сай йöн. Кызыт ончычсо семын кужу кутышым ом куржтал, но шкан вич километржым кажне кечын эртем, – мане финиш деч вара таҥасымашын чемпионжо Вячеслав Афанасьев.
– Марий автономийын шочмо кечыжлан Марий калык конгресс дене чапле таҥасымашым эртарен кертна. Конгресс вуйлатыше Эдуард Иманаев кумылаҥдыш, полшыш: «Ыштена, таҥасымаш гоч шочмо кундемнам утларак палдарыме семынат лиеш мане». А финишыш толын шумекыже, тудо эшеат кумылаҥдыш, кросс-гандикапым кажне ийын эртараш темлыш. Чынжымак, вес кундем гыч толшылан тиде спорт пайрем визитный картычке семын лие. Ончыкшым тиде таҥасымашым йÿлаш пурташак кӱлеш, иктешлен мане В.Мартьянов.
Кросс-гандикапым эртараш полшымылан «Волжские полуфабрикаты» фирмылан, амалкалче-шамыч Н.Мавринлан, Т.Павловлан, Е.Казаковалан, спорт судья, волонтёр, медицине пашаеҥ-шамычлан кугу тау.
Е.Эшкинина.
Л.Николаеван фотожо.
