Гвардий старший лейтенант Константин Акмазиков «Герои Марий Эл. Талешке-влак» регионысо программыш ушнен.
Кызыт тудо Донбассыште службым эрта. Йошкар-Ола гыч «Победа» позывноян талешке сеҥымаш верч кажне кечын тырша. Тудо ойла:
– «Герои Марий Эл. Талешке-влак» кадр проект шонымашем илышыш шыҥдараш полшен кертеш. Марий Элысе посёлкылаште тазалыкым аралыме да кундемым тӱзатыме алан-влакым вияҥдымашке надырым пыштынем. Ветеран-влаклан полшынем.
Константин кеч-могай пашам мучаш марте шукташ тырша. Йошкар-Ола воктенсе Семёновка селасе В.С.Архипов лӱмеш школышто тунеммыж годым мотоспорт дене заниматлен. Вара Йӱдвел флотышто теҥыз пехотышто службым эртен. Армий деч вара Москосо кугыжаныш управлений да право институтышто тунемын.
– Йочам годым генерал лияш, ачамын, изамын да кочамын (нуно чылан военный улыт) корныштым тошкаш шоненам, – палдара К.Акмазиков.
Салтак «За отвагу» медаль, II степенян «За заслуги перед Отечеством» орденын медальже дене палемдалтын.
Йошкар-Ола администрацийын ВК-се лаштыкше гыч налме фото.