3 августышто Шернур район Кандрач почиҥгаште ял пайрем лийын.
Кандрач почиҥга Марий Элнан эн тора лукыштыжо, Киров область чек дене, верланен. Йошкар-Ола гыч 150 наре меҥге лиеш. Ял сылне вершӧрыштӧ, Корак, Мераҥ, Кӱ памаш-влак да чодыра воктене, шинча.
Кандрач почиҥга Коньга эҥерын шола серыштыже верланен. Ты эҥер Немда эҥерыш йоген пура. Преданий почеш, XVII курым кыдалне Коньга эҥерыште священнослужитель вӱдвакшым шынден, воктенже ныл пӧртым чоҥеныт. Тунам ял Поповын вӱдвакш ялже маналтын. Тыгай вывеске Никандр Романович Ямбаршев дене кужу жап аралалтын. Вӱдвакш 1961 ий марте ыштен, шурным шияш воктен ялла гыч веле огыл, Киров область гычат толеденыт.
Почиҥган лӱмжӧ тыште эн ончыч илаш тӱҥалше Кондрат (Кондратий) дене кылдалтын. Ялыште утларакшым Ямбаршевмыт, Алмаметовмыт да Конаковмыт фамилиян еҥ-влак улыт.1950 ийыште ял Калинин лӱмеш колхозыш пурен, 1961 ий гыч – «Казанский» совхозыш, а 1963 ий гыч – «Кукнурский» совхозыш, вара – «Эшполдинский» совхозыш, кызыт – «Северный» СПК-ш.
Кугу Ачамланде сарыш ял гыч 28 еҥ каен, 13 еҥ сар гыч пӧртылын огыл.
Кызыт ялыште 16 суртышто 45 еҥ ила.
Пайремыш Кандрач почиҥган икымше трактористкыже Антонина Никандровна Ямбаршеват толын. Ял лӱмлӧ еҥже-влак дене кугешна. Нунын коклаште изак-шоляк Ямбаршевмытым палемдыман: Василий Анатольевич – Эшполдино школын туныктышыжо да директоржо, тудын шольыжат Виктор Анатольевич – туныктышо, а Геннадий Анатольевич – милиций полковник, Марий Элын сулло юристше. Акак-шӱжарак Галина Никандровна ден Лидия Никандровна Ямбаршевамыт тиде школынак туныктышыжо-влак улыт. Алексей Дмитриевич Конаков –
милиций полковник.
Пайрем пеш веселан эртен. Ял калык кугу ӱстел сийым ямдылен. Эн кугу ийготан-влак Василий Анатольевич Ямбаршевлан, Вера Ивановна Конаковалан да эн изи икшыве Вероника Ямбаршевалан пӧлекым кучыктеныт. Людмила Тихоновна Ямбаршева Галя, Зина да Роза акаж-влак дене пырля «Кандрач ялем – шочмо верем» мурым сылнын йоҥгалтареныт. Ольга Ямбулатован гармоньым шоктымыж почеш ял калык шуко мурым мурен.
Ял пайремыш Волгоград область, Красноярск, Краснодар кундемла да моло тора вер гыч толыныт да шочмо ялым ятыр поро мут дене шарналтеныт.
Пайрем гӱжлен: мурым муреныт, куштеныт, изи годсо жапым шарналтеныт. Йоча-влакланат тӱрлӧ модышым эртареныт, кугыеҥ-шамычланат оҥай таҥасымашлам ямдыленыт. Кастене дискотеке лийын. Ял пайремым сӧрастараш Кукнур тӱвыра пӧртын пашаеҥже-влак полшеныт. Пайрем программым Эшполдино клуб вуйлатыше, Кандрач ялын старостыжо Л.М.Алгаева ден библиотекарь И.А.Тойшева ямдыленыт.
Тиде весела пайрем кажнын шӱмыштӧ сай кышам кода, ончыкылан вийым пуа.
Антонина Ямбулатова.
Авторын фотожо.
