18 апрельыште Медведево посёлкысо тӱвыра полатыште (Советский урем 23 пӧрт) «Марий Элын марий йылмым эн сайын туныктышо — 2022» республикысе профессионал мастарлык конкурсым торжественно почыныт.
Конкурсант-влакым саламлаш Марий Эл Республикысе образований да шанче министр Лариса Анатольевна Ревуцкая, Марий Элысе образований пашаеҥ-влакын профсоюз ушемжын председательже Людмила Васильевна Пуртова, Медведево район администрацийым вуйлатыше Дмитрий Сергеевич Окулов да Медведево район администрацийын образований пӧлкажым вуйлатыше Наталия Николаевна Дербенева толыныт.
Тений «Марий йылмым эн сайын туныктышо» лӱм верч 5 туныктышо таҥасат: Небогатикова Земфира Васильевна, Михайлова Ирина Леонидовна, Кузьмина Эльвира Петровна, Сергеева Любовь Анатольевна, Богомолова Роза Александровна.
Почмаш деч вара Медведево посёлкысо 2-шо №-ан кыдалаш школышто мастер-классым эртареныт.
19 апрельыште марий йылмым туныктышо-влак Оршанке районысо Кугунур селасе кыдалаш школышто да Медведево посёлкысо 4-ше №-ан кыдалаш школышто урокышто шуктымо сомылышт да проект пашашт дене палдарат.